भांगरभूंय | प्रतिनिधी
शिक्षक केन्नाच वायट आसना, तो विद्यार्थ्यांचें सदां बरें चिंत्ता, म्हूण शिक्षकांनी केल्ल्या त्यागांची गाथा संवसारभर आयकूंक मेळटा.
बरो शिक्षक कोण काय म्हूण विचारलें जाल्यार एका शिक्षकाचे गूण कोणूय सांगतलो, पूण ताचे पलतडी नदर घालची गरज आसा. आयज शिक्षणान खूब उंचलो दर्जो मेळयला, ते प्रमाणें आमचे शिक्षक आसात व्हय? आदीं शाळीक शिक्षकांचेर चड भर आशिल्लो, पूण आतां उंचलें शिक्षण जिविताची दिशा थारावपी जालां. उच्च माध्यमीक तशेंच कॉलेज पावंड्यार शिक्षकांक चड म्हत्व आयलां. देखून भुरग्यांक योग्य तरेन फुडें व्हरप शिक्षकांचेर धरिल्लें आसा. जे शिक्षक शिकोवप आपलो वेवसाय न्हय तर भक्ती मानतात, त्या शिक्षकांक आमचो सलाम. ह्या लेखांत शिक्षकांचे दोश न्हय पूण कांय मार्गदर्शक तत्वां फुडें घालपाचो यत्न करतां.
बरो शिक्षक
जो शिक्षक शिस्त सांबाळटा, उत्तम संवाद कौशल्यान शिकयता, सहानुभूती दाखयता, विद्यार्थ्यांक समजून घेता, तांका धीर दिता आनी तांचे प्रगती खातीर एक पोशक, सर्वसमावेशक, आकर्शक वातावरण तयार करता तो बरो शिक्षक, अशें म्हणटात. बरो शिक्षक विद्यार्थ्यांक घडयता, फुलूंक आदार दिता, तांच्या विंगड विंगड शिकपाच्या गरजां प्रमाणे जुळोवन घेता. तांकां कान दिता आनी तांच्यो जटील कल्पना स्पश्टपणान समजायता, विद्यार्थ्यां मदीं वेगळोचार करिना आनी सदांच तांकां आदार करूंक मुखार आसता तो बरो शिक्षक. हाचे भायर शिक्षकाचे आनीकूय बरे गूण आसात.
शिक्षकां मदलें वेगळेपण
विद्यार्थी तीन तरांचे आसतात : हुशार, सादारण आनी अशक्त. हुशार विद्यार्थ्यांक सगळे शिक्षक बरे करतात. प्रस्न आसता तो सादारण आनी अशक्त विद्यार्थ्यांचो. आदीं हुशार आसात तेच भुरगे उंचले शिक्षण घेताले, पूण आयज सरकारी सवलतींक लागून वा पालकांक दिसता आपलीं भुरगीं शिकचीं म्हूण, वेवसायीक मळाचेर लेगीत विद्यार्थ्यांचो आंकडो वाडला. धावी मेरेन वातावरण एक आसता, इकरावेक पावतकच बदल सुरू जाता आनी बारावी जावन वेवसायीक कॉलेजींत प्रवेश घेतकच तांचो कस लागता. विद्यार्थ्यांक खरें मार्गदर्शन जाय तें ह्या वेळार. म्हज्या धाकट्यान फांकी इंजिनियरींग कॉलेजींत प्रवेस घेतलो आनी तो घुस्मटपाक लागलो. उणेच तीन विशयांत ताची प्रगतीच जायना जाली. पयल्या वर्साच्या निकाला वेळार एके शिक्षिकेन म्हाका सरळ सांगलें, ताचे कडेन शिकूंक जावंचें ना, ताका दुसरे कडेन घालात. म्हज्या पुतान आव्हान स्विकारलें आनी निमाण्या वर्सा तो पयल्या वर्गांत पास जालो. शिक्षक अश्या सभावाचे आसत जाल्यार विद्यार्थ्यांचो फुडार घडूंक शकता?
शिक्षण कित्या खातीर?
आयच्या काळार गरीब जावं गिरेस्त, ताका शिक्षण म्हत्वाचें. कित्याक तें मनशाक गिन्यान, चिकित्सक विचार करपाची कुशळटाय आनी स्थिरताय दिवन सशक्त करता, ताची वैयक्तीक वाड करता आनी समाजीक प्रगती खातीर ताची बुन्याद घट्ट करता. ताका लागून मनशाची अर्थीक वाड जाता, गरिबीचें दुश्टचक्र मोडटा, बरी भलायकी दवरूंक आदार जाता आनी जिणेच्या उत्तम जिवनमाना खातीर सुजाण निर्णय घेवंक समर्थ करता. आपली उदरगत करूंक शिक्षणा परस वेगळें साधन ना. पूण एकूच खंत आसा, ती म्हणल्यार आमचें शिक्षण फावो तसली नोकरी दिवंक असमर्थ थारता. गोंयांत धंदे निर्माण करतना, भुरग्यांक तांच्या शिक्षणा प्रमाणे नोकरी मेळटली हाची सरकारान जतनाय घेवंक जाय. बरें शिक्षण घेवन कितलीं भुरगीं बेकार भोंवतात, ताणीं शिक्षणाक दोशी थारावपाची पाळी येवंक जायना.
बरो शिक्षक, बरो विद्यार्थी
कांय पावटीं अशें पळेवंक मेळटा, एक मनीस बरो शिकला, ताका खंयच नोकरी मेळना म्हूण तो शिक्षक जाता. तो शिक्षणीक पेशाक न्याय दिता काय? आडवाद आसात, तो बऱ्यांतलो बरो शिक्षक जावंक शकता. ते खातीर तो नव्या विचारांक उगतो, ताचें मन विद्यार्थ्यां प्रती मोगाळ, विद्यार्थ्यांच्या मनांत येवपी दुबाव पयस करपाची ताच्यांत तांक आसूंक जाय. घडये त्याच वेळार विद्यार्थ्यांच्या प्रस्नाक जाप दिवप शक्य नासता, तेन्ना उपरांत सोद करून दुसऱ्या दिसा ती जाप विद्यार्थ्यां मेरेन पावयल्यार शिक्षकी गूण दिसुं येतात. कांय विद्यार्थी शिक्षकांची टिंगल करतात, वर्गांक सारकी हाजेरी लायनात वा शिकयतना लक्ष दिनात, अश्या विद्यार्थ्यांच्या दोळ्यांत दोळे घालून संवाद करप खूब फायद्याचें. पाठांत विद्यार्थ्यांक सहभागी करून शिकयल्यार मुदयेर थीक बशिल्ल्या सारकें. गरज दिसल्यार उपायात्मक वर्ग घेवंक जो शिक्षक तयार आसता तो विद्यार्थ्यांक जिखून घेता. विद्यार्थी आनी शिक्षक हांचें नातें जुळ्ळें जाल्यार ताळी बरी पेट्टा.
एक देख
गणीत हो सदां नाका दिसपी विशय. स्कुलाच्या दिसां सावन तो भुरग्यांक आवडना. पूण पास तर जावंक जाय. देखून गणीत तोंडपाठ शिकप सामकें घातक. अशें आयकलां, इकरावेक गणीत दोन भागांनी वांटलां आनी पास जावंचे खातीर सोंपें आसा तें घेवंचें अशी सुचोवणी जाता. हे विशीं एक जाणकार शिक्षक सांगता, तें शिक्षण खात्यान सामकें चुकीचें केलां. कित्याक गणीत म्हणल्यार बुद्धीचो वापर करूंक शिकप. व्हड जातच वा वेवसायीक शिक्षण घेतना खंयच्याय विशयांत तर्क करूंक गणीत विशय आदार करता. गणितांत आशिल्लीं सुत्रां (फाॅर्मुला) अडचणी पयस करूंक तर्क शिकयतात. गणीत म्हणल्यार जिविताचें मुळावण, तें वगळावन फुडें वचपाचो यत्न करप म्हणल्यार सोंपेपण जोडूंक गिन्यान घाणाक दवरप. कॉलेजींत जायते विद्यार्थी गणीत विशया वेळार ‘बंक’ मारतात हें सारकें न्हय. एका यशस्वी मनशा फाटल्यान सदां ल्हानपणांतल्यान शिकून आयिल्लें गणीत आसता.
सोंपयतना…
भारतीय घटनेचो बापूय डॉ. बाबासाहेब आंबेडकार हांचो विस्वास आशिल्लो, उपेक्षीत घटकांतल्या लोकाक मुक्त करूंक, समाजीक गुलामगिरी ना करूंक आनी समानताय मेळोवक, शिक्षण हें एक बळिश्ट तशेंच परिवर्तनकारी हत्यार आसा. शिक्षणाक लागून मनीस आत्मसम्मान वाडयता, अन्याय आड विचार करता, आपले हक्क समजून घेता आनी समाजांत ताका कोणूच निचा दाखोवंक शकना. हें सगळें करूंक ताका एक शिक्षक तयार करता. जायते फावटीं म्हणटात, घरा उपरांत स्कूल जावन आसा दुसरें घर. थंय मेळिल्ल्या गिन्याना वरवींच आपलें खासगी जिवितूच न्हय तर सरकार चलोवंक लेगीत उपाय मेळटा. म्हणून मनशान शिकूंक जाय आनी शिकोवप्यान प्रमाणीकपणान आनी इमानदारेन ताका समाजांत उबो रावूंक तयार करूंक जाय. फकत पुस्तकी गिन्यान न्हय तर जसो आपूण घडला, तसोच ताकाय घडोवंक आव्हान स्विकारूंक जाय. शिक्षक केन्नाच वायट आसना, तो विद्यार्थ्यांचें सदां बरें चिंत्ता, म्हूण शिक्षकांनी केल्ल्या त्यागांची गाथा संवसारभर आयकूंक मेळटा. देखून म्हणटां, शिक्षक शिक्षणा परस असामान्य.
—-
– विन्सी क्वाद्रूस, राय, साश्ट, गोंय.
मो. – 9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
