भांगरभूंय | प्रतिनिधी
– बोरकाराच्या 39 ए आंदोलना उपरांत कोफुसांव
– मनोज – विरेशा मदीं समेट करपाचो यत्न अपेसी
– दोगांयचे गट वांगडी सोशल मिडियाचेर आक्रमक
पणजीः 39 (ए) कलम आड सांतआंन्द्रेंचे आमदार विरेश बोरकार हांणी आंदोलन केले उपरांत रिव्होल्युशनरी गोवन्स पक्षात (आरजीपी) वेर पडपाक सुरवात जाल्या. फाटले दोन-तीन म्हयने हे कोफुसांव पक्षाच्या भितरल्या भितर शिजताले. पूण आतां हे कोफुसांव पुराय उक्तडार आयला. हे फाटभूंयेर पक्षाचे फुडार किते आसतलो हाचेर सगळ्याचे लक्ष जावन उरला.
गोपांनी दिल्ले म्हायती प्रमाण आरजीपीची केस्तांवां आतां सामकीच तेंगशेर पावल्यात. सद्या मनोज परब आनी विरेश बोरकार हांणी एकामेकां कडेन उलोवपाचे बंद केला. सद्या ते दोगय एकामेकाच्या संपर्कांत नात देखून तांचे मदीं मध्यस्थी करून विशय सुटावो करपाचे यत्न चालू आसात. पुण मनोज परब गट आनी विरेश बोरकार गट एकामेका मुखार येवपाकच तयार नात म्हण हे मध्यस्थीक अपेस आयला. देखून हो पक्ष फुटपांत जमा आसा. हे परिस्थितींत पक्षाचो फुडार किते आसतलो म्हण सगल्या जाणांचे लक्ष लागून उरला.
सद्या मनोज परब हांचे गटात पक्षाची केंद्रीय कार्यकारी समितीचे वांगडी आसात. तशेंच पक्षाचे व्हड पदाधिकारी जशे सरचिटणीस विश्वेश नायक, भांडारी अजय खोलकार आनी हेर परब हांकां समर्थन दितात. जाल्यार, विरेश बोरकार हांचे गटांत सा लोरेन्सची झेडपी वांगडी तृप्ती बकाल, उत्तर गोंय सरचिटणीस लिसीयो रोन्कोन, साश्टीतले फुडारी डॅगली फर्नांडीस आनी युके रावपी हेर वांगड्यांचो आस्पाव आसा. सद्या परब हांणी बोरकार हांच्या सांत आंन्द्रे मतदारसंघातल्या आरजी वावुरप्यांक लक्ष करपाक सुरवात केल्ल्यान बोरकार हांचे मुखार पेच तयार जाला.
दोन दीस जाले विरेश बोरकार हांकां सपर्क करपाचे यत्न चालू आसले. आयज तांणी भांगरभूंयक प्रतिसाद दिवन पक्षात कसलेच भतभेद नात आनी आपूण काँग्रेसींत प्रवेश करचो ना इतलेच म्हणून आपले मौन मोडला.
पक्षाचे सुप्रिमो मनोज परब हांणी सोशल मिडीयाचेर मंगळारा आरजीपीच्या काय पदाधिकाऱ्यांची, चडशे बोरकार हांच्या लागची बरीच टीका केल्ली. पुण आयज सकाळी तांणी एकच पोस्ट घालून आपली बाजू मांडली. बुधवारा सकाळी मनोज हांणी फेसबूकाचेर पोस्टांत बरयला की आयच्या संवसारांत राजनायिक जावपाक नम्रताय म्हणटात आनी उक्तेपणान उलोवप अहंकार म्हणटात.
दुसरे वटेन विरेश बोरकार हे शांत आसात. हे वादाचे फाटभूंयेर तांणी प्रतिक्रीया दिवप सामकेच टाळ्ळां. आपल्या दर दिसाचे कामाच्यो घडामोडी तांणी सोशल मिडियाचेर शेअर केल्यात. पूण हे वादा विशीं एकूय उतर सोशल मिडियाचेर काडूंक ना.
बोरकार हे शांत आसात. पूण तांच्या बरे मागप्यांनी सोशल मिडियाचेर उलोवप केल्या. बोरकार हांचे लागीचे डॅगली फर्नांडीस हांणी विरेश बोरकार हांची शांती हो माथाळो घालून एक लेख बरयला. त्या लेखांत डॅगली हांणी म्हणला, गोयांत एक विचित्र शांतताय पातळ्ळ्या. पूण केन्ना केन्ना… शांतताय म्हळ्यार दुबळताय न्हय. केन्ना केन्ना शांतताय म्हळ्यार एका मनशाची झुजा खातीर चलिल्ली तयारी. जेन्ना हेरांनी उलोवपांत, हिशोबांत आनी तडजोडींत कसब मेळयलें… तेन्ना एका आमदारान संघर्शाची वाट वेंचली. विरेश बोरकार हो ताच्या भ्रश्टाचाराक लागून वादांत येवंक ना. तो वादांत आयलो, कारण ताणें गोयच्या त्या नसेक हात लायलो. आनी ती नस म्हळ्यार 39 ए. हो पोस्ट बोरकार हांच्या बरे मागप्यांनी नेटान शेअर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
