भांगरभूंय | प्रतिनिधी
नर्सींग सयत नॅचुरोथेरपी अभ्यासक्रमाचो प्रवेश हुमकळ्ळो
पणजी : वैजकी,दांत, नर्सींग मेळून नीट परिक्षेच्या गुणांचेर गोंयांत वेवसायीक म्हाविद्यालयांत वट्ट 824 सुवातो आसात. तरेकवार वेवसायीक म्हाविद्यालयांनी ह्यो सुवातो आसा. नीट परिक्षा रद्द जाल्ल्यान ह्यो 824 जाग्यांचेर प्रवेश दिवपाक कळाव जातलो. हाचो हेर अभ्यासक्रमाच्या प्रवेशाचेर लेगीत परिणाम जातलो, अशी म्हायती गोपांनी दिली.
गोंय वैजकी म्हाविद्यालयांत एमबीबीएसच्या पयल्या वर्सा खातीर 200 विद्यार्थ्यांक प्रवेश दितात. हे भायर बीडीएस (दांत म्हाविद्यालय) 50, बीएचएमएस (होमीओपॅथी) 30, बीएएमएस (आयुर्वेदीक) 160, बी. एससी (नर्सींग) 340 आनी बीएनवायएस (नॅचुरोथेरपी) 44 विद्यार्थ्यांक प्रवेश दितात. सगळे मेळून 824 जागे आसात. अभियांत्रिकी, फार्मसी पदवी अभ्यासक्रमा खातीर जीईईच्या गुणांचेर प्रवेश जाता. ह्या अभ्यासक्रमांचो नीट परिक्षे कडेन संबंद नासता.
गुणेस्त विद्यार्थी विज्ञान फांट्यांत प्रवेश घेतात. बारावी विज्ञाना उपरांत गुणेस्त विद्यार्थी वैजकी अभ्यासक्रमाचीच चड करून निवड करतात. हाका लागून गोंया सयत हेर राज्यांनी गुणेस्त विद्यार्थी नीटची परिक्षा दितात. गोंयांत 4 हजार जाणांनी नीटची परिक्षा दिल्ली. उत्तर गोंयांत 3 हजार जाल्यार दक्षीण गोंयांत 1 हजार विद्यार्थी आशिल्ले. ह्या सगळ्या विद्यार्थ्यांक आता नीट परिक्षा परतून दिवची पडटली.
एमबीबीएस अभ्यासक्रम फकत गोंय वैजकी म्हाविद्यालय हॉस्पिटलांत आसा. आयुर्वेदीक (बीएएमएस) अभ्यासक्रमा खातीर गोमंत आयुर्वेद म्हाविद्यालय (शिरोडा) आनी अ. भा. आयुर्वेद संस्था (धारगळ) हांगा जागे आसात. बी. एससी. (नर्सींग) अभ्यासक्रमा खातीर मात हरमल, साई इन्स्टिट्यूट आनी बांबोळे हांगा जागे आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
