भांगरभूंय | प्रतिनिधी
पणजीः केंद्र सरकारान बुधवारा सावन भांगर-रुप्याचेर आयात कर वाडयला. आयात कर 6 टक्क्यां वयल्यान 15 टक्क्यांनी वाडयला. ह्या निर्णया उपरांत फकत कांय वरां भितर देशभरांत आनी राज्यभर भांगर-रुप्याच्या दरांत व्हड प्रमाणांत वाड जाली.
एक तोळो भांगराचो दर कॅरेटाचेर आदारून 8 ते 10 हजार रुपया वाडलो. जाल्यार एक कील रुप्याचे दर 11 ते 13 हजार रुपया वाडले. दर वाडिल्ल्यान गुंतवणूक म्हणून भांगर आनी रुप्याची खरेदी उणी जावपाची शक्यताय आसली तरी कांय थळाव्या ज्वेलर्सांनी लग्न आनी हेर उत्सवा खातीर खरेदी चालूच उरतली असो विस्वास उक्तायला. कांय जाणांनी भांगराचे विक्री विशीं हुस्को उक्तायला.
हे संबंदी गोवा ज्वेलर्स असोसिएशनाचे समीर कुडतरकार हांणी सांगलें, आयात कर वाडिल्ल्यान गोंयांत भांगर-रुप्याचे दर अचकीत वाडल्यात. पूण जीएसटी दर अजून लागू आसा. गोंयांत भांगर चड करून लग्न वा हेर उत्सवा खातीर विकतें घेतात. अशा सुवाळ्या वेळार भांगर विकतें घेवप ही एक गरज जाल्या. भांगर विकतें घेवप ही प्रथा जाल्या. दर वाडलो तरी गोंयचे लोक आपल्या लग्नाक भांगर निश्चीत घेतले. पूण फुडाराक हाका लागून गुंतवणूक म्हणून भांगराच्यो बिस्कुती वा बुलियन घेवपी लोकांचो आंकडो उणो जावं येता.
तांणी सांगलें, कांय दिसां आदीं प्रधानमंत्री नरेंद्र मोदी हांणी भांगर घेवचें न्हय अशें आवाहन केल्लें. पूण गोंयांत ह्या आवाहनाक उणो प्रतिसाद मेळपाची शक्यताय आसा. भांगराची खरेदी उणी जाल्यार ह्या वेवसायाचेर आदारून आशिल्ल्या कारागिरांचोय विचार करचो पडटलो. उदरनिर्वाहाचे पर्यायी साधन म्हणल्यार कितें तें तांकां स्पश्ट जावंक जाय. थळाव्या भांगरकारांनी ह्या वेवसायांत कोटी रुपयांची गुंतवणूक केल्या. देखून आमचोय विचार करचो पडटलो. गुंतवणूक म्हणून भांगर घेवचे परस गरज पडटा तेन्नाच भांगर घेवपाचें आवाहन आमी करतात.
दर वाडिल्ल्यान गिरायकांचो आंकडो उणो करून वेवसायाचेर परिणाम जावपाची शक्यताय आसा अशें आनीक एका भांगराकारान सांगलें. गोंयांत लग्नांक उण्यांत उणें 10 तोळो भांगर विकतें घेतात. ते खातीर दर वाडपाक लागून रक्कम उणी जावं येता. गुंतवणूक म्हणून भांगराची खरेदी राज्यांत उणी जावं येता. कांय गिरायक पोरन्या भांगराची नव्या भांगराची अदलाबदल करतात. हातूंत भांगर आयात करपाची गरज ना. देखून सरकारान हे पद्दतीन कर सुट दिवपाचो विचार करचो. सणाच्या हंगामांत भांगराची खरेदी वाडोवपा खातीर आमी वेगवेगळ्या ऑफरांचेर विचार करतात.
मुख्यमंत्र्याक पत्र बरयतले
आयात कर वाडल्या उपरांत खरेदीचेर जावपी परिणामाचो अभ्यास करतले अशें समीर कुडतरकार हांणी सांगलें. हाचे उपरांत आमी मुख्यमंत्र्याक पत्र बरयतले. हातूंत आमच्यो समस्या मांडटले. अशेंच पत्र प्रधानमंत्री कार्यालयाकय बरयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
