भांगरभूंय | प्रतिनिधी
150 जाणांक नोटीस
वाळपय, प्रतिनिधी ः वाळपय पालिका वाठारांत वेवसाय आनी विक्री परवानो नासतना चलपी वेवसाय पालिका सील करतली. जायत्या दुकानदारांक हे संबंदी पालिकेन नोटीस जारी केल्या. तांकां मुजत दिल्ली, ती आतां सोंपल्या. हाका लागून फुडल्या आठ दिसांत सील करपाची कारवाय जातली अशें वाळपयची नगराध्यक्ष प्रसन्ना गांवस आनी उपनगराध्यक्ष शेख फैझल हांणी स्पश्ट केलें.
वाळपय पालिका वाठारांत जायत्या सुवातींनी बेकायदेशीर दुकानां चलतात. वेवसाय सुरू करचे पयलीं पालिके कडल्यान वेवसाय आनी विक्री परवानो घेवप गरजेचें आसता. पूण, ताचे कडेन जायत्या जाणांनी आडनदर केल्या. हाचो परिणाम वाळपय पालिकेच्या येणावळीचेर जाला. जायते फावटी हे संबंदी विनवणी करून लेगीत दुकानदारांनी जाप पसून दिवंक ना. हाका लागून 150 परस चड वेवसायिकांक पालिकेन नोटीस जारी केल्या.
मजगतीं, कांय वेवसायिकांक हे सुचोवणेची दखल घेवन वेवसाय आनी विक्री परवानो मेळयला. तांतूतल्यान आतां मेरेन पालिकेक सुमार 13 लाख रुपया येणावळ मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
