भांगरभूंय | प्रतिनिधी
अनुवादक, चित्रकारान उक्तायली तिडक
इफ्फी अधिकारी अंकिता मिश्रा म्हणटा, कारण नासतना हो मुद्दो वयर काडला
पणजी, प्रतिनिधी: साहित्यीक आनी आदले आमदार सर्गेस्त विष्णू सूर्या वाघ हांच्या ‘सुदिरसुक्त’ ह्या कोंकणी कविता संग्रहांतली ‘सेक्युलर’ ही कविता इफ्फीच्या ‘पिकॉक’ नेमाळ्यांत घेतिल्ली. ती अचकीत काडून उडल्या. हे विशीं अनुवादक तशेंच वाघ हांचो भाचो कौस्तुभ नायक आनी चित्रकार सिद्धेश गौतम हांणी तिडक उक्तायल्या.
कौस्तुभ नायक हांणी, इफ्फीचें नेमाळें पळोवप्यान म्हाका विष्णू वाघ हांची ‘सेक्युलर’ हे कवितेचो इंग्लीशींत अणकार कर म्हणिल्लें. ते प्रमाण हांवें तो करून दिलो. ही कविता पिकॉकच्या २६ नोव्हेंबरच्या अंकांत छापून येवपाची आशिल्ली. वांगडा सिद्धेश गौतम हांचें चित्रूय छापपाचे आशिल्लें. कांय दिसांनी म्हाका कळ्ळें गोंय मनरिजवण संस्थेच्या (ईएसजी) कांय वरिश्ठ अधिकार्यांनी ही कविता काडपाक सांगलें. ही कविता काडून तांणी पिकॉकचो अंक छापपाक परवानगी दिली. आयतारच्या अंकांत ही कविता घेवंक ना. मात चित्र घेतलां. ही कविता कित्याक काडली, ताचें कारण म्हाका खबर ना. ही कविता प्रस्थापितांच्या विरोधांत आशिल्ल्यान काडल्या आसूं येता अशेंय तांणी म्हणलां.
सिद्धेश गौतम हांणी इंस्टाग्रामा वरवीं तिडक उक्तायल्या. तांणी म्हणलां, आयजूय शारी वा गांवगिर्या वाठारांत जातीं मदीं भेदभाव जाता. सेक्युलर कविता ही ताचें योग्य प्रतिनिधित्व करता. ताका लागून ही कविता आपणें वेंचून काडिल्ली. एक विद्यार्थी वा एक प्रतिथयश कलाकार आशिल्ल्यान म्हाका खूबदां जातीभेद सोंसचो पडला. ताका लागून हांव म्हज्या इन्स्टाग्रामचेर ही कविता शॅर करतां’.
‘सुदिरसुक्त’ हो कवितासंग्रह २०१३ वर्सा प्रकाशीत जाल्लो. ताका गोवा कोंकणी अकादेमीचो पुरस्कार जाहीर जाल्लो. ह्या कवितासंग्रहांतल्या कांय कवितां वयल्यान विष्णू वाघ हांचेर एफआयआर दाखल केल्ली. उपरांत सरकारान अकादमीचे तेन्नाचे सगळे पुरस्कार रद्द केल्ले. ह्या पुस्तका वयल्यान साहित्य मळाचेर वाद, विवाद रंगिल्ले.
कांयच कारण नासतना हो मुद्दो वयर काडला: अंकिता मिश्रा
विष्णू वाघांची कविता काडपा फाटलो हेतू तांचे कवितेक विरोध करपाचो नासलो. हो संपादकीय मंडळाचो निर्णय आशिल्लो. जर हे कवितेक संपादक मंडळाचो खर विरोध आशिल्लो जाल्यार अंकांत विष्णू वाघांचें इलस्ट्रेशनूय छापचे नासले. कांयच कारण नासतना हो मुद्दो हाजीर केला अशें ईएसजीची मुख्य कार्यकारी अधिकारी अंकिता मिश्रा हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
