भांगरभूंय | प्रतिनिधी
मुख्यमंत्र्याची पालिकांक सुचोवणी
पणजी ः केंद्र सरकारच्या विश्वकर्मा येवजणे वरवीं स्वताचो वेवसाय सुरू करपी गोंयकारांच्या घराच्या पत्त्याचेर ट्रेड लायसन्स दिवचे. ट्रेड लायसन्स दितना तांचे मुखार कसलेच संकट हाडचे न्हय अशें निर्देश शेनवारा मुख्यमंत्री डॉ. प्रमोद सावंत हांणी राज्यांतल्या सगळ्या पालिकांक दिलें.
‘आत्मनिर्भर भारत-स्वयंपूर्ण गोंय’ वरवीं ते उलयताले. केंद्र सरकारान गोंय सयत देशभरांतल्या 18 प्रकारच्या कारागिरांक चालना दिवपा खातीर विश्वकर्मा येवजण सुरू केल्या. राज्यांतल्या हजारो कारागिरांनी आतां मेरेन हे येवजणे खातीर अर्ज केल्यात. पात्र कारागिरांक सुरवातीक प्रशिक्षण आनी उपरांत 15 हजारांचें टूलकिट फुकट दितले. हाचे भायर वेवसाया खातीर सुरवेक एक लाख आनी उपरांत तीन लाख रिण राष्ट्रीय बँकां वरवीं दितले. हाचे भायर सुरवेक एक लाख आनी उपरांत तीन लाख ऌरीण राष्ट्रीय बँकां वरवींय वेवसाया खातीर दितले. देखून कारागिरांक स्वताचो वेवसाय सुरू करपाची संद मेळटली. अशे परिस्थितींत येवजणेचो फायदो घेवन स्वताचो वेवसाय सुरू करपाक तयार आशिल्ल्या राज्यांतल्या कारागिरांक, वेवसाय परवाने दितना कसल्याच प्रकारच्यो आडमेळी येवच्यो ना हे खातीर यत्न करात. तांकां तांच्या घराच्या पत्त्याचेर ट्रेड लायसन्स दिवचे अशें मुख्यमंत्री डॉ. सावंत हांणी पालिकांक सुचोवणी दिलां. राज्यांतल्या कारागिरांक विश्वकर्मा येवजणेचो व्हड फायदो जातलो. केंद्राची ही येवजण स्वयंपूर्ण गोंय मोहीमेक आनीक घटमूट करतली असोय विस्वास तांणी उक्तायला.
मजगतीं, विश्वकर्मा येवजणे खाला आतां मेरेन राज्यांतल्या 20 हजार कारागिरांनी पोर्टलाचेर नोंदणी केल्या अशी म्हायती नियोजन, सांख्यिकी आनी मूल्यमापन खात्याचे संचालक विजय बी. सक्सेना हांणी शुक्रारा पत्रकारां कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
