विनयभंगाची कागाळ खंडणी खातीर
भांगरभूंय | प्रतिनिधी
आयएमए, गोंय फांट्या वतीन पुलिसांक निवेदन
मडगांव, प्रतिनिधी : दोतोरा आड विनयभंग प्रकरणाची चवकशी मुळाव्या पांवड्यार सुरू आसा. ह्या प्रकरणांत खंडणीची मागणी केल्या, तशी कागाळ केल्यार ताचेरूय चवकशी करतले. चवकशी करपी पुलीस अधिकारी बदलपाची मागणी मडगांवच्या दोतोरांनी केल्ल्या. वरिश्टां कडेन उलोवन हे विशीं निर्णय घेतले अशी म्हायती पुलीस उपअधीक्षक संतोष देसाय हांणी दिली.
फाटल्या सप्तकांत मडगांवच्या एका दोतोरा आड विनयभंगाची कागाळ दाखल जाल्ली. ते प्रमाण पुलिसांनी दुबाविता कडल्यान जाप नोंद करून घेवन गुन्यांव दाखल केल्लो. दोतोराचें नांव पिड्ड्यार करपा खातीर हो गुन्यांव नोंद केला. ताचे आड फटींग कागाळ नोंद जाल्या आनी खंडणीचो प्रकार घडिल्ल्यान योग्य तरेन तपास करपाची मागणी इंडियन मेडिकल असोसिएशनाच्या मडगांव फांट्यान केल्या. तशें निवेदन तांणी पुलिसांक दिलां.
आयएमए मडगांव अध्यक्ष डॉ. बबिता प्रभुदेसाय हांणी सांगलें, दोतोराचेर फटीचे आरोप करून, तांचें नांव पिड्ड्यार करून खंडणी मागपाचो हो प्रकार जावन आसा. हाका लागून 77 पिरायेच्या दोतोराचें नांव पिड्ड्यार जालां. हे विशीं गुन्यांव नोंद करतना तपास अधिकार्यांनी योग्य चवकशी करूंक ना. ताका लागून हें प्रकरण पुलीस उपनिरीक्षकां कडल्यान दुसर्या अधिकार्या कडेन दिवचें आनी हे संबंदी योग्य तपासणी करची. तशेंच क्लिनीक बंद दवरपाक सांगलां, तें परत उक्तें करपाची परवानगी दिवचें.
उपअधीक्षक संतोष देसाय हांणी दोतोरांचें म्हणणें आयकून घेतलें. विनयभंग प्रकरणाचो तपास मुळाव्या पांवड्यार सुरू आसा. तपास अधिकारी बदलप आनी ताची खात्या खाला चवकशी करपा खातीर वरिश्ठां कडेन उलोवन निर्णय घेतले. खंडणी मागपाची कागाळ दिल्यार हे विशीं चवकशी करतले. चवकशी पुराय जाल्यार उपरांत हे विशींचें सत कितें आसा तें मुखार येतलें, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
