भांगरभूंय | प्रतिनिधी
-लोकसभा वेंचणुकेचो पयलो टप्पो
नवी दिल्लीः लोकसभा वेंचणुकेच्या पयल्या टप्प्यांत (19 एप्रील) जावपी 21 राज्यां आनी केंद्रशासीत प्रदेशांतल्या 102 मतदारसंघांतलो प्रचार बुधवारा सांजे सोंपलो. सत्ताधारी राष्ट्रीय लोकशाय आघाडी आनी विरोधी पक्षांच्या इंडिया अाघाडीच्या जायत्या वरिश्ठ फुडाऱ्यांनी ह्या टप्प्यांत मतदारांचेर प्रभाव पाडपाचो यत्न केलो. पयल्या टप्प्यांत महाराष्ट्रांत पूर्व विदर्भांतल्या पांच मतदारसंघांत मतदान जातलें. पयल्या टप्प्यांत पूर्व विदर्भांतल्या नागरपूर, रामटेक, चंद्रपूर, गडचिरोली आनी भंडारा-गोंदिया ह्या पांच मतदारसंघांत मतदान जातलें. पूर्व विदर्भ हो भाजपाचो बालेकिल्लो म्हूण वळखतात. ह्या पांचूय मतदारसंघांत म्हायुती आड म्हाविकास आघाडी अशी थेड लडत जातली.
2019 च्या वेंचणुकेंत पांचांतल्यान चार सुवातो भाजप-शिवसेना युतीन जाल्यार एक सुवात काँग्रेसीन जिखिल्ली. अंदूं केंद्रीय मंत्री नितीन गडकरी, रानमंत्री सुधीर मुनगंटीवार हे ताकदीचे उमेदवार रिंगणांत आसात.
पयल्या टप्प्यांतल्या प्रचारांत राष्ट्रीय लोकशाय आघाडीच्या प्रचाराची धुरा मुखेलपणान प्रधानमंत्री नरेंद्र मोदी हांणीच सांबाळ्ळी. तशेंच केंद्रीय गृहमंत्री अमीत शाह, संरक्षण मंत्री राजनाथ सिंह हांचे सयत मंत्रीमंडळांतल्या तांच्या जायत्या सहकाऱ्यांनी रालोआच्या उमेदवारांचो प्रचार केलो. जाल्यार इंडिया आघाडीच्या उमेदवारांचो प्रचार काँग्रेसचे अध्यक्ष मल्लिकार्जुन खरगे आनी खासदार राहूल गांधी हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
