भांगरभूंय | प्रतिनिधी
पणजी: आयज पणजे जाल्ले पत्रकार परिशदेंत भलायकी मंत्री विश्वजीत राणे हांणी, म्हजो बाबा प्रतापसिंह राणे आनी श्रीपाद नायक हांचें नातें वेगळें अशें सांगलें. कॉंग्रेसींत आसतनाय प्रतापसिंह राणे हांणी लोकसभा वेंचणुकेंत सदांच श्रीपाद नायक हांकांच तेंको दिल्लो, अशें मत तांणी उक्तायलें. ह्या वेळार आमदार केदार नायक आनी भाजपा सचीव दामोदर नायक हाजीर आशिल्ले.
हांव जायते फावट बाबा कडेन उलयतां. त्या वेळार तांणी कॉंग्रेसींत आसतनाय श्रीपाद नायकाक तेंको दिल्लो अशें सांगिल्लें. देखून सत्तरी म्हालांतल्यान श्रीपाद नायक हांकां भोवमत मेळ्ळां. हे खेपेय गोंयची उदरगत जावपा खातीर आपूण श्रीपाद हांकांच तेंको दितलो, अशें तांणी स्पश्ट केलें. देखून हे वेंचणुकेंत श्रीपाद नायक हांकां सत्तरी तालुक्यांत चडांत चड मतां मेळटलीं, असो म्हाका विस्वास आसा अशें मंत्री राणे हांणी सांगलें.
मंत्री राणे हांणी, म्हजो बाबा मुख्यमंत्री आसतना तांणी गोंयांत उदरगतीचीं कामां केलीं. तांणी केल्ल्या कामाची छाप आजूनय गोंयचेर आसा. तांणी केल्ल्या कामाक लागून तांचे आजूनय देशाच्या नेतृत्वा कडेन बरे संबंद आसात. मात तांणी एक कॉंग्रेस फुडारी म्हणून न्हय जाल्यार ‘प्रतापसिंह राणे’ म्हणून गोंयची उदरगत केली. ते आदीं प्रतापसिंह राणे आशिल्ले मागीर कॉंग्रेस पक्ष, अशें मंत्री राणे हांणी सांगलें.
विरोधक स्मार्ट सिटी कामांक कॅगान तासलां अशें सांगतात. तांणी कॅगाचो संदर्भ म्हाका दाखवचो. तो नासल्यार ताचेर चर्चा करून उपेग ना. विरोधकांक दिसल्यार तांणी कॅगाक पत्र बरोवन चवकशेची मागणी करची. कॅग अहवाल ऑडीट आनी हेर गजाली तपासता. हातूंत कितेंय तांत्रीक आडखळी आसूं येतात. हे विशीं मुख्यमंत्री डॉ. प्रमोद सावंत हांणी स्वता लक्ष घालां. तांणी विवीध खात्यांक सुचवण्यो दिल्यात अशें राणे हांणी सांगलें.
फोंडेंच्या सरकारी हॉस्पिटलां विशीं आमदार विजय सरदेसाय हांणी न्यायालयांत वतलों अशें म्हणलां. एके वटेन सरदेसाय मडगांवां पब्लीक प्रायव्हेट हॉस्पिटलाक विरोध करता. दुसरे कडेन न्यायालयात वचपाचें सांगतात. तांकां दिसता जाल्यार तांणी न्यायालयांत वच्चें, अशेंय राणे हांणी फुडें म्हणलें.
मनोज परब नांवाच्या खंयच्याच मनशाक हांव वळखना. ताचें नांव हांव पयलेच खेप आयकतां. म्हजे आड वेंचणूक लढोवप्यांची वळेरी बरीच व्हड आसता. हांव ते वळेरींतलीं नांवांय पळयना, अशें मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
