भांगरभूंय | प्रतिनिधी
नवी दिल्ली, खबरां संस्था: दिल्लींतल्या खुबश्या शाळांनी बॉम्ब दवरिल्ल्याची धमकावपी ईमेल आयल्या. द्वारका आनी नोएडा हांगचीं दिल्ली पब्लिक स्कूल, मदर मैरी आनी संस्कृती स्कुलांतूय बॉम्ब स्फोट करपाची धमकी मेळ्ळ्या. वसंत कुंज हांगच्या डीपीएस आनी साकेत हांगच्या एमिटीकूय बॉम्बस्फोट घालपाची धमकी दिल्या. दिल्ली, द्वारका आनी नोएडा लागसारच्या ५० ते ६० शाळांक धमकी दिवपाची म्हायती मुखार आयल्या. द्वारका आनी अशोक विहार हांगच्या प्रूडेन्स स्कूलाकूय धमकी दिल्या. ह्या सगळ्या शाळांक बॉम्ब दवरिल्ल्याचे ईमेल आयल्यात. दिल्ली पुलीस सगळ्या शाळांची चवकशी करतात. आतां मेरेन पुलिसांक कसलीच दुबावी वस्तू सांपडूंक ना. बॉम्ब डिफ्यूज करपी यंत्रणां शाळांच्या वाठारांत तैनात केल्यांत.
दिल्ली पुलिसांनी कांय शाळांक धमक्यो दिल्ल्याची म्हायती मेळ्ळ्या अशें सांगलें. प्राथमीक म्हायती प्रमाण कांय शाळांनी आदीं सावन धमक्यांचे मेल चलत आयल्यात. मेलांत डेटलायनीचो उल्लेख करूंक नाशिल्ल्याची म्हायती मुखार आयल्या. मेलांत बीसीसी आशिल्ल्यान एकूच मेल खुबशे कडेन गेल्ल्याचें समजलां. हे विशीं पुलीस चवकशी करतात अशें तांणी फुडें सांगलें.
धमकी प्रकरणा उपरांत द्वारकाच्यो डीपीएस शाळो बंद केल्यात. नोएडा डीपीएस नॉलेज पार्कचीय शाळा बंद दवरीत भुरग्यांक घरा धाडल्यात. सचदेवा ग्लोबल स्कुलांतूय सुटी जाहीर केली.
धमकेचे मेलींत कांय खरेंपण ना
दिल्लींतल्या पुलीस अधिकार्यान हे धमकेचे ई मेलीचेर प्रतिक्रिया दितना सांगलें, अशी मेल धाडपी मनशान एकाच वेळार जायत्या खाजगी आनी सरकारी संस्थांक एकूच मेल धाडपाचो यत्न केला. आमी ह्या प्रकरणाची खोलायेन चवकशी करतात. धमके उपरांत हॉस्पिटलांनीय सोद घेवप चालू आसा. आजूनय कसलीच दुबाव येवपा सारकी गजाल मेळूंक ना. हे धमकेचे जे ईमेल आयल्यात तातूंत कांयच खरेंपण ना, अशें पुलिसांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
