भांगरभूंय | प्रतिनिधी
नवी दिल्ली, खबरां संस्था: हिंदू लग्न हो विधी न्हय आनी नाचपाची, खावपाची वा सोरो पियेवपाची कार्यावळ न्हय अशी टिप्पणी सर्वोच्च न्यायालयान केल्या. सप्तपदी आनी हेर विधी नासतना हिंदू लग्न वैध ना अशेंय न्यायालयान स्पश्ट केलां. एका प्रकरणाचे सुनावणे वेळार न्यायमूर्ती बी. नागरत्ना विभागीय खंडपिठान हो निर्णय घेतला.
सर्वोच्च न्यायालय कितें सांगता?
‘हिंदू लग्नांत गरजेच्यो विधी पाळूंक ना जाल्यार लग्न वैध आसचें ना. अशीं लग्नां निरर्थक मानतले. नोंदणी केले बगर लग्न वैध आसचें ना. हिंदू लग्नाच्या काळांत सप्तपदी सारक्या संस्कारांक खूब म्हत्व आसा.’ असो निर्णय सर्वोच्च न्यायालयान घेतला. तशेंच वादाच्या बाबतींत अशो पद्दती पुरावो म्हणून मान्य करतात, अशें न्यायालयान स्पश्ट केलां.
हिंदू विवाह हो एक संस्कार आशिल्ल्यान भारतीय समाजांत हाका एक म्हत्त्वाची संस्था म्हणून दर्जो मेळपाक जाय. तशेंच तरणाट्यांनी लग्नाचो विचार करतना भारतीय समाजांत विवाह संस्था कितली पवित्र हाचो विचार करपाक जाय, अशेंय न्यायालयान म्हणलां.
लग्न म्हळ्यार नाचप- गावप, जेवप, सोरो पियेवन वा हुंड्या सयत नाका जाल्यो वस्तू दिवप घेवप करपाची कार्यावळ न्हय. हो भारतीय समाजांतलो एक म्हत्वाचो समारंभ. हे कार्यावळींतल्यान बायल आनी दादल्या मदीं विशिश्ट नातें तयार जाता तांकां घोव-बायलेचो दर्जो दितात, अशीय टिप्पणी न्यायालयान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
