भांगरभूंय | प्रतिनिधी
पणजी, प्रतिनिधी : वैजकी, अभियांत्रिकी, फार्मसी, आयुर्वेदीक, नर्सिंग ह्या वेवसायिक म्हाविद्यालय प्रवेशाची प्रक्रिया 13 मे सावन सुरू जातली. दर वर्सा प्रमाण अंदुंय तांत्रिक शिक्षण संचालनालया वरवी ती जातली. तांत्रिक शिक्षण संचालनालयाच्या गोपांनी ही म्हायती दिली.
प्रवेशाची म्हायती पुस्तिका तांत्रिक शिक्षण संचालनालयाच्या संकेतथळाचेर आसा. प्रवेशाचे अर्ज 13 ते 24 मे मजगतीं सकाळीं 10 ते सांजे 5 मेरेन सादर करचे, अशी सुचोवणी केल्या. आयतारा अर्ज घेवचे नात. तांत्रिक शिक्षण संचालनालय (पर्वरी), पाद्रे कोन्सेसाव कॉलेज (वेर्णा), डॉन बाॅस्को कॉलेज (फातोर्डा), आग्नेल इन्स्टिट्यूट (आसगाव), बांदेकार फार्मसी महाविद्यालय (फर्मागुडी) ह्या संस्थांनी प्रवेश अर्ज घेवपाची वेवस्था आसा.
इत्सुक विद्यार्थ्यांनी 24 मे मेरेन अर्ज सादर करचे. वैजकी, दांत, आयुर्वेदीक प्रवेश नीट परिक्षेच्या गुणाचेर जातलो. अभियांत्रिकी, फार्मसी प्रवेश जेईई परिक्षेच्या गुणाचेर जातलो. परिक्षेचे निकाल जाहीर जावंक नासले तरी ह्या तारखे भितर प्रवेश सादर करप आवश्यक आसा, अशें तांत्रिक शिक्षण संचालनालयान कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
