भांगरभूंय | प्रतिनिधी
नारायणपूर, खबरां संस्था: छत्तीसगडांतल्या नारायणपूर जिल्ह्यांतल्या अबुझमाड भागांत सोमारा सांजेवेळार उसरां पुलिसांनी ऑपरेशन प्रहार सुरू केलें. जवानांनी नक्षलवाद्यांच्या तळार हल्लो करून १० जाणांक सोंपयले. ह्या हल्ल्यांत व्हडा प्रमाणांत नक्षलवादी जखमी जाल्ल्याची म्हायती आसा. आतां मेरेन ९ नक्षलवाद्यांच्यो कुडी सांपडल्यात. हातूंत ३ बायल नक्षलवाद्यांचो आसपाव आसा.
माडच्या रानांत मंगळारा सांजवेळार मेरेन जवान हजर आशिल्ले. दोनूय वटांनी अदीं मदीं फारपेट करतात. बस्तरचे पुलीस महानिरीक्षक सुंदरराज पी. हांणी, छत्तीसगड-महाराष्ट्र शिमेर अबुझमाडच्या पांगूर ग्रामपंचायतीचे आश्रीत गांव टेकामेटा भागांत मंगळारा सकाळीं पुलीस आनी नक्षलवाद्यां मदीं फारपेट जालो.
सुत्रांनी सांगलें, ज्या नक्षली छावणीचेर जवानांनी हल्लो केलो थंय नक्षलवाद्यांचें व्हडलें कॅडर आशिल्लें. मरण आयिल्ल्या नक्षलवाद्यां कडल्यान एके-४७ सारकीं शस्त्रां जप्त केल्यांत. आदीं १६ एप्रिलाक कांकेर जिल्ह्यांत पुलीस आनी बीएसएफच्या जवानांनी २९ नक्षलवाद्यांक मारून उडयल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
