भांगरभूंय | प्रतिनिधी
ह्या दिसांनी तरणाट्यांक आंगाचेर टॅटू काडपाचें पिशें लागलां. उत्तर प्रदेशांतल्या वाराणसी जिल्ह्यांत टॅटू काडले उपरांत २६ जाणांक एचआयव्हीची लागण जाल्ल्याची शक्यताय उक्तायल्या. केस स्टडी आनी फाटल्या इतिहासाच्या आधाराचेर टॅटू काडल्या उपरांत एचआयव्ही संसर्ग जावपाची शक्यताय आसता. एकेच सुयेन परत परत टॅटू काडल्यार संसर्ग जावपाचो धोको आसता. मजगतीं, सवाय दुकानां आनी गर्देचे सुवातेर काडचो न्हय असो सल्लो डॉक्टरांनी दिला.
आझमगढ, मिर्जापूर आनी वाराणसी विभागांतल्या धा जिल्ह्यांनी २६,८९० लोकांक एच.आय.वी. आसा. हातूंतले ५० टक्के लोक २० ते ४५ वर्सां पिरायेचे आसात. टॅटू कागले उपरांत ४० जाणांक एचआयव्ही जाल्ल्याचें कळ्ळां.
वाराणसींतल्या २६ लोकांक टॅटू काडले उपरांत एचआयव्ही संसर्ग जाल्ल्याचें समजलां. वाराणसीच्या एआरटी सेंटराच्या वरिश्ठ वैजकी अधिकारी डॉ. प्रीती अग्रवाल हांणी ह्या २६ एचआयव्ही पॉझिटिव्ह लोकांच्या केस स्टडीच्या आधारार तिणें निश्कर्श काडला. तिणें म्हणलां, एचआयव्ही संसर्गाची तीन मुखेल कारणां म्हळ्यार असुरक्षीत लैंगीक संबंद, संक्रमीत रक्त संक्रमण आनी तेच सुयेंतल्यान वखदां घेवप. उपरांत ह्या २६ लोकांच्या डॉक्टरांचें लक्ष तांच्या शरिरा वयल्या टॅटूं कडेन गेलें. ह्या सगळ्या जाणांच्या आंगार टॅटू आशिल्ले.
डॉक्टरांच्या म्हणण्या प्रमाण, टॅटू करपी चुकीच्यो सुयो वापरतात. टॅटू करपाक वापरपी सुयांची किंमत १२०० रुपया आसा. अशें आसून लेगीत सगळे कडेन २०० रुपयांनी टॅटू करतात. भलायके कडेन फकांडां करप चल्ल्यां. सुयेचो परत परत वापर करप हें एक संसर्गाचें मुखेल कारण जावन आसा.
भलायकी विभागा वतीन दरेका जिल्ह्यातल्या शासकीय हॉस्पिटलांनी एआरटी केंद्रां चलतात. हांगा एचआयव्ही बादीत लोकांची नोंदणी करतात. उपरांत गरजेची तपासणी आनी उपचार करतात. १० जिल्ह्यांतल्या एआरटी केंद्रांच्या तपासणेंत बाधितांचो आंकडो वाडिल्ल्याचें कळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
