भांगरभूंय | प्रतिनिधी
वास्को, प्रतिनिधी: वास्कोच्या रवींद्र भवनाक चड निधी मेळचो. तशेंच इफ्फीच्या वेळार वास्कोच्या लोकांक बर्यो कार्यावळी मेळचे खातीर आपूण यत्न करतलों, अशें पंचायत मंत्री मॉवीन गुदिन्हो हांणी सांगलें. आमची मुळावी संस्कृताय आमची वळख आशिल्ल्यान ती तिगोवन दवरपाची गरज आसा अशें तांणी स्पश्ट केलें.
रवींद्र भवनाचे नवे कार्यकारिणीच्या अधिकारग्रहण सुवाळ्यांत मंत्री गुदिन्हो उलयताले. ह्या वेळार मुरगांवचे आमदार संकल्प आमोणकार, वास्कोचे आमदार दाजी साळकार, रवींद्र भवनाचे अध्यक्ष जयंत जाधव, उपाध्यक्ष डॉ. धर्मेंद्र प्रभुदेसाय, कार्यकारिणी वांगडी रवळनाथ पेडणेंकार, शांताराम पराडकार, सदानंद घोणसेकार, अंकुश च्यारी, अरविंद शिंदे, धोंडू ( दामू) कोचरेंकार, प्रकाश गांवस, अर्चना कोचरेंकार, दिलीप काजळे, गौरिश नायक हाजीर आशिल्ले.
रवींद्र भवनाक बर्यो कार्यावळी मेळच्यो जाका लागून तरणाट्यांक उर्बा मेळटली तशेंच नागरिकांकूय बरे कलेचो अणभव घेवपाक मेळटलो. सध्या बर्यो कार्यावळी पणजी, मडगांव हांगाच सादर जातात. त्यो मुरगांव म्हालाकूय मेळप गरजेच्यो. हे विशीं आपूण मुख्यमंत्री डॉ. प्रमोद सावंत, कला आनी संस्कृती मंत्री गोविंद गावडे हांचे कडेन उलयतलों अशें गुदिन्हो हांणी म्हणलें.
रवींद्र भवनाक मेळपी निधी तिचो सांबाळ खरपाकूय खर्च जावन वता. ताका लागून चड निधी मेळपा खातीर आपूण यत्न करतलों. रवींद्र भवनांत सध्या मुरगांव उपजिल्होधिकारी, मामलेदार कार्यालय, वास्को भलायकी केंद्र कार्यरत आसा. येवपी काळांत तांची योग्य सुवातेर वेवस्था करपाची गरज आसा. अशें केल्यार रवींद्र भवन फकत कले खातीरूच वापरपाक मेळटलें अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
