भांगरभूंय | प्रतिनिधी
मारिया बार्रा कुशीक शुक्रारा मध्यान रातीं घडलो प्रकार
वाळपय: सत्तरी म्हालांतल्या वाळपय शारांतल्या मारिया बार वाठारांत शुक्रारा (20 जून) उसरां रातीं घडिल्ल्या एक धक्को दिवपी घडणुकेंत एका मनशान पयली नागरिकाचेर धारेच्या वाहनाचे चावयेन हल्लो करून गंभीर दुखापत केल्ल्याची घडणूक घडली. उपरांत घडणूक थळार दाखल जाल्ल्या पुलीस कर्मचाऱ्यांचेरूय हल्लो करून तांच्या अर्तव्यांत आडमेळीं निर्माण केल्ल्या प्रकरणांत वाळपय पुलिसांनी आरोपीक अटक केल्या.
ह्या प्रकरणांतलो कागाळदार नामदेव महादेव गांवस (58), सहाय्यक पुलीस उपनिरिक्षक पणजी हांगा कार्यरत आसून तांणी वाळपय पुलीस स्टेशनार कागाळ दाखल केल्या. ह्या कागाळीच्या आदाराचेर वाळपय पुलिसांनी सुनील गजानन मडकयकार (36) रा. गुळेम भाट, चिंबल, तिसवाडी हाचे आड गुन्यांव दाखल केला.
पुलिसां कडल्यान मेळिल्ले म्हायती प्रमाण 20 जून दिसा रातीं सुमार 11.05 वरांच्या सुमाराक मारिया बार्रा कुशीक हो प्रकार घडलो. आरोपी सुनील मडकयकार हाणें सुरवातेक लखपत सिंग ह्या मनशाचेर वाहनाचे चावयेक तकलेर आनी फाटीर वार करून तशेंच ताका मारपेट केली. ह्या हल्ल्यांत लखपत सिंगाक रक्तस्राव जातलो अश्या स्वरुपाच्यो दुखापती जाल्यो.
घडणुकेची म्हायती मेळटकच पुलीस नियंत्रण कक्षाच्या (पीसीआर) पंगडाक घडणूक थळार धाडून दिलो. कागाळदार एएसआय नामदेव गांव, हवालदार ओली खान आनी पीसीआर वाहन चालक गंगो खरवत हे घडणूक थळार पावून परिस्थिती नियंत्रणांत हाडपाचो यत्न करताले. पूण त्या वेळार आरोपी आनीक आक्रमक जालो.
पुलिसांच्या म्हणण्या प्रमाण, आरोपीन हवालदार ओली खान हांकां सेगीत मारपेट करून तांचे नाक आनी चेऱ्याचेर गंभीर दुखापत केली. हाका लागून सरकारी कर्तव्य करीत आशिल्ल्या पुलीस कर्मचाऱ्याच्या कामांत आडमेळीं निर्याण जाली. इतल्यारूच थांबनासतना आरोपीन पुलिसांक अश्लील आनी गाळयांचे भाशेंत अपमानीत केले तशेंच जिवेशी मारपाची धमकी दिल्ल्याचें कागाळेंत नमूद केलां.
हे घडणुके उपरांत वाळपय पुलिसांनी रोखडीच कारवाय करून आरोपीक ताब्यांत घेतलो. ताचे आड भारतीय न्याय संहिता 2023 मदलें कलम 118(1), 132, 121(1), 352 आनी 351(3) खाला गुन्यांव नोंद केला. उपरांत आरोपीक अटक केली आनी फुडलो तपास पुलीस करतात.
मजगतीं, वाळपय पुलीस ह्या प्रकरणाचो अदीक तपास करतात. घडणुकेच्या वेळार हाजीर आशिल्ल्या साक्षिदांराचे जबाब नोंद करपाची प्रक्रिया सुरू आशिल्ल्याची म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
