भांगरभूंय | प्रतिनिधी
वेंचणूक लागीं येतना दारांत आयिल्ल्यांक बेगीन वचचें दिसचेंना इतलें गोंय बदललां. भिरांत इतलीच आसा स म्हयनेच न्हय सदां खातीर तांकां गोंयांत राबितो करचो अशें दिसतलें.
गोंय विधानसभा वेंचणूक लागीं येतना नित्य नव्यो घोशणा सरकार करता. विरोधी राश्ट्रीय आनी प्रादेशिक पक्ष आयजय एकवटान वेंचणुकेंत देंवपाच्या विचार, भासाभासेंत घुस्पल्यात.
फोंड्या विधानसभा पोटवेंचणूक जावंक नाशिल्ल्यान त्या मतदारसंघांतले मतदार बेजार आसात? मतदार आपलो नित्याचो वावर करुन घेवंक शकनात? सरकारी कचेऱ्यो, अधिकारी तांचे खातीर नात? सगलेच सरकार, आमदारांचेर निंबून रावतात? जापो राजकी पक्षांनी सोदच्यो. फोंड्यांक वाऱ्यार सोडप कोणाक शक्य ना. फोंडें म्हत्वाचो मतदारसंघ, सगल्यांच्यो नदरो आयजय त्या मतदारसंघाचेर आसात. मतदारसंघांतल्यान यो- वच करपी मंत्री, आमदारय आसात.
वेंचणूक लागीं येता तेन्ना आमदारांक उमेदवारी मेळोवपाचो आनी मेळपाचो हुस्को आसा. त्या हुस्क्यांत मतदारसंघ उदरगतींत फाटीं पडला अश्यो खबरोय पातळटात. बारीकसाण घेतल्यार फोंडें राजपाटण हें सरकाराकय लागीं आयलां हें कळटलें. येरादारीची कोयंडी उणी जाल्ल्यान, उदरगतीची नवी संद आशिल्ल्यान फुडारांत फोंडें मतदारसंघ सगल्यांक जाय जातलो. शेजारी राज्यां, राज्यांतल्या प्रदेशिक पक्षांकय तो मतदारसंघ आपोवणे दिवंक लागला.
देस पावंड्यार नव्या प्रादेशिक पक्षांची बांदावळ, खासदारांचें “मर्जर” राजकारण मोन्यांनी जालें. रातयां शिक्के, वह्यो तपासप आनी सह्यो करप, पक्ष फोडप एका तेंपार गोंय विधानसभेंत जालें. देस पावंड्यार भौमताच्या राजकारणात तें चित्र दिसता. तसलें राजकारण गोंयांत आयज ना, गोंय शांत आसलें तरी उमळशीक गोंयकारांक आसा. गोंयच्याय राजकारणात दाखय, लिपय फुडले पांच स म्हयने जातली. सर्त सुरु जाल्या, 80 मतांचें जैत स म्हन्याभितर 800 चेर पावंक शकता.
म्हजें घर, म्हजो फ्लॅट येवजण क्रांती करतली, पन्नास हजार मतां खिणांत हाडचीना. दुस्मानांची पांच हजार मतां सरकाराच्या दाल्यांत पडटलीं, आमचें दायज घर येवजणय चालीक लागतली. पडिंग सरकारी सुवाती दिसतल्यो, कावला अड्ड्यांचे सुवातींत नितळसाण, कोयर वेवस्थापन येवजणींची बांदावळ जातली. तळ्या वझऱ्यांतल्यो मूर्ती, भांगर तळीं, वझरे उपशितना मेळ्ळ्यार बोवाळ घालपी आसतले. मोलावणी कशी करप ताची नेमावळ मतदारांनी घडोवची. मतदारांनी राजकी पक्षाच्या अध्यक्षांक, सरचिटणीसांक घराच्या दारांत येवपाचो आग्रो उमेदवारी मेळिल्ल्यांचे बराबरीन करचो. उसरां जागे जावपी हेर राज्यांतले गोंयची खबर घेत राविल्ले. वेंचणूक लागीं येतना दारांत आयिल्ल्यांक बेगीन वचचें दिसचेंना इतलें गोंय बदललां. भिरांत इतलीच आसा स म्हयनेच न्हय सदां खातीर तांकां गोंयांत राबितो करचो अशें दिसतलें. ते आपल्या सोयऱ्यांक, फुटिल्ल्या घराब्याक हाडटले. गोंयांतले देव आनी मनीसपण आसा. नवीं देवळां, घरां जाल्यांत तांचो सोद घेवपी गोंयकार कितले आसात?
विधानसभा वेंचणुकेचें वारें चवथीक नेटान व्हांवतलें, पावसय आसतलो. पावसांत लागसल्ल्या पांच घरांनी वचप मंत्री, आमदार सोडटले? सर्तींक येवपी, वांटो घेवपी उणेच तरीय तांकां येवकार दिवन तोखणाय करचीच पडटली, अनवळखी आसल्यार, नासल्यारय.
तांक आसूनय विधानसभा वेंचणुकेंत धा मतदारसंघांनी उमेदवार दिवप कठीण जाता. नेतृत्व एके रातींत घडना हें आमदार विजय सरदेसाय हांकां होलमलां. काँग्रेसींतल्यान तांचें राजकारण सुरु जाल्लें, युवा काँग्रेसीचे दीस तांकां परत याद जातले. बेगीन एकवट करपाची मागणी करतना धा उमेदवार प्रादेशिक पक्षांनी तयार दवरचे. पक्षाची अस्मिताय राखून दवरपा पासत तांचो उपेग जावंक शकता. शेजारच्या राज्यांतल्यान आयिल्ले आमदार विजयाच्या घरा रातयां पावल्यार तें सरकाराक पयलीं कळटलें. पक्षांतल्यान जिखून आयिल्ले आमदार फोडल्यार ते पयलीं खंय वतले ताची जाणवीकाय आयज फातोड्डेंच्या आमदाराक जाल्या. तांकां मडगांवच्या आमदारांवरी राजकारण ज्या पक्षांत सुरु जाल्ले त्या घरा वचपाची उमळशीक लागल्या. दोन वर्सांआदीं आमदार विजयाक मडगांव आपल्याक जिखून दितलें अशें दिसतालें. मडगांवांत वेंचणुकेंत सर्त पळेल्यार तांकां आपलो मतदारसंघ बरो दिसतलो. नेतृत्व घडोवपाक तळागाळांतले थळावे यंत्रणेतलो वेंचणूक अणभव उपेगी, कांय वेळार अणभवय म्हारग पडटा हें तांकां कळ्ळां. घरा परतल्यार पक्षांतरां आडावपाची, वांगड्यांक बराबरीन व्हरपाचे तयारेक फातोड्डेंचे आमदार लागल्यात. बोवाळांत गोवा फाॅरवर्डांत गेल्ले फाटीं आयल्यार तांकांय फाटल्यांतल्यान तेंको दिवपाची तयारी करची, काँग्रेस आनी फाॅरवर्डान.
मुख्यमंत्रीपदाच्या मुकुटांत कांटे आसतात, सगलेच मुख्यमंत्री जावंक सोदतात, निर्णय सरकाराचो, एकवटाचो आसता हें मंत्र्यांक खबर आसचें. गोंयांत बेगीन वेंचणूक जावची हें आयज सगल्या राजकी पक्षांक दिसपाक लागलां. कळाव जाल्यार फोंड्याचे पोटवेंचणूक प्रचारांत आनी उपरांत जाल्लें, जावपी राजकारण हुस्क्याचें.
तेलाचें, अण्वस्त्रांचें झुज सोंपलां तें परतून पेटचेंना हाची जापसालदारकी घेवपी वरीश्ठ राजकारण्यांक घर बरें दिसतलें. संवसारीक झुजाचे वाटेर म्हाभारताची प्रतिमा झगझगल्या, ती तिगोवप सगल्यांची लागणूक. देस आनी देसांतल्या, राज्य आनी राज्यांतल्या नागरीकांची ती परिक्षा. ते परिक्षेंत मनीसपण, भुरगेपण जैता मेरेन व्हरतलें, जैतांत वांटेकार जातनाय हुस्को आसताच, घराचो आनी राश्ट्राचो.
वेंचणुके पयलीं चार म्हयने राज्यांत येवन मेळावे घेवंक सोदतल्यांक गोंयच्या जात्रा, फेस्तांचे दीस याद जातले. जात्रा, फेस्तांतल्यान राजकारण पयस दवरप आयज ना हें तांकां कळ्ळां. अळम्यां वरीं वेंचणुकेच्या वगतार येवपी राजकी पक्षांक गोंयांत वेगळोचार करपाक मेळचोना हें समजावन सांगपी आसतले. गोंय भारतांतलें सुपुल्लें राज्य, उपरांतय राज्यां जाल्यांत. गोंयकार आपली अस्मिताय जागयतना हेर राज्यांत, देसांत, विदेसांत वचूंक शिकल्यात, शिकयतात हें सत. दुसऱ्या राज्यांतल्यान वेंचणुकेवेळार येवपी प्रादेशिक पक्षांक तें सत उदरगतींतल्यान कळटलें, आदल्यो यादीय जातल्यो. यादी जागोवच्यो, गोंयकारांक खुबळावन घाल्यार जाप दिवपाक गोंयचे मुख्यमंत्री आसात. जाल्ल्यो चुको सुदारुन फुडार पळयत वतना फाटल्यान कित्याक पळोवप? गोंयकारांचे हावेस स्वतंत्र रावपाचे, उदरगतींतल्यान ल्हान पावलां मारत व्हड जावपाचे.
गोंय मुक्तीच्या होमखणात वांटो घेतिल्ल्यांक आयज राज्य आपलें दिसता. राजकारण धांवतना राज्यांतले मनीस, मनीसपण दिसल्यार, दुस्मानानी येवकार दिल्यार गोंयकार न्हय मतदार सादूर जातले. मतदार वळेरी तपासपाक परतून मामलेदार, ब्लाॅक डेव्हेलाॅपमेंट आॅफिसर न्हय नवे कंत्राटी शिक्षक घरा येतले. तांकां प्रशिक्षण मेळ्ळां आसतलेंच, म्हायती आसतली नगरपालिका आनी विधानसभा वेंचणूक मतदारसंघांची.
गोंयां भायले प्रदेशिक पक्ष राश्ट्रीय राजकारणात वतात तेन्ना तांकां पयलीं गोंय दिसता बदलपी. गोंयकारांकय बदल दिसतात, ते कशे विसरतले?
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
