भांगरभूंय | प्रतिनिधी
पावसा खातीर लोकां कडल्यान देवाक गाराणीं
पणजी: गोंयांत आयतारा दमट हवामान आशिल्लें. सत्तरी, दिवचले सयत बऱ्याच वाठारांनी पावस शिरशिरलो. हाका लागून मात्शी थाकाय मेळ्ळी. मात शिरशिरपाचें रुपांंतर दडकेंत जालें ना. हवामान खात्यान आयज सोमार (22 जून) आनी मंगळारा (23 जून) पावसाचो येलो अॅलर्ट जारी केला. मॉन्सुनाचे आगमन जावन पंदरा दीस जाल्लें आसलें तरी अजून पावस नाशिल्ल्यान हुस्क्याची स्थिती कायम आसा.
पावस नाशिल्ल्यान शेतकारां खातीर हुस्क्याची स्थिती आसा. पावस पडचो म्हूण सांखळे भाजप किसान मोर्चाच्या वांगड्यांनी देवा कडेन गाराणें घालें. तशेंच आयतारा म्हापशें बोडगेश्वर देवा कडेन लेगीत प्रार्थना केली. खोर्जुंव्यां किल्ल्या कडेन पावसा खातीर प्रार्थना जाली.
आयतारा कांय कडेन पावस शिरशिरलो. पावस पडपाचे वातावरण आशिल्लें. काणकोण, दिवचले, सत्तरी हांंगा पावस पडलो. पणजेंत रातीं मात्सो पावस पडलो.
अजून मेरेन गोंयांत फक्त 167.5 मिमि (6.59 इंच) पावसाची नोंद जाल्या. हे प्रमाण 72 टक्के उणें आसा. फक्त 10 जूनाक सगल्यांत चड म्हणल्यार 24.7 मिमि पावसाची नोंद जाल्ली. एकूय दीस 1 इंचा परस चड पावसाची नोंद जावंक ना. धरणांनी म्हयनोभर पुराय जातलें इतले उदक आशिल्ल्याचो दावो सरकारान केल्लो आसलो तरी अंजूणें धरणात उदकाची पातळी सामकी उणी जाल्या. पेरणी करपा खातीर शेतकार पावसाची वाट पळयतात. पावसा खातीर देवा कडेन गाराणीं घालपाक शेतकारांनी सुरवात केल्या. पावस नाशिल्ल्यान अंदूं पेरणीक कळाव जावन शेतीच्या सगल्या कामांक उशीर जातलो. पावस नाशिल्ल्यान शेतकारांं खातीर हुस्क्याची स्थिती आसा.
आता मेरेन फक्त काणकोणां सगल्यांत चड 411 मिमि (16.18 इंच) पावसाची नोंद जाल्या. सगल्यांत उणो पावस फोंड्यां 91.9 मिमि (3.61 इंच) पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
