एव्हीएस कंपनीचे १०२३.८५ कोटींचे मालमत्तेचेर तात्पुरती जप्ती

भांगरभूंय | प्रतिनिधी

पणजी : अंमलबजावणी संचालनालयान (ईडी) मनी लॉन्डरिंग प्रतिबंधक कायदो, २००२ अंतर्गत अनिल साळगांवकार (एव्हीएस) समुहा कडेन संबंदीत गोंयच्या लोहखनिज खण प्रकरणांत सुमार १०२३.८५ कोटी रुपयांचे मालमत्तेचेर तात्पुरती जप्ती हाडल्या.
१९ जून २०२६ तारखेर जारी केल्ल्या आदेशा प्रमाण जप्त केल्ले मालमत्तेंत भारतांतल्या ९९ अचल मालमत्ता : किंमत सुमार ४५९.१० कोटी रुपया, सिंगापूरची ३१ अचल मालमत्ता- किंमत सुमार ४७१.३२ कोटी रुपया, भारतीय कंपन्यांतली समभाग : किंमत सुमार ९३.४२ कोटी रुपया हांचो आसपाव आसा.
गोवा सीआयडी क्रायम ब्रँचान दाखल केल्ले एफआयआरच्या आदारार इडीने तपास सुरू केल्लो. सर्वोच्च न्यायालयान २०१४ आनी २०१८ च्या निकालांत २२ नोव्हेंबर २००७ उपरांत गोंयांत केल्लें खणकाम बेकायदो आशिल्ल्याचें नमूद केल्लें.
ईडीच्या तपासा प्रमाण, २००७ ते २०१२ मजगतीं १० खाण पट्ट्यांनी बेकायदो खाणकाम करून २,४९२.९५ कोटी रुपयांचें उत्पन्न मेळयलां. तशेंच उण्या दरान परदेशांतल्या शेल कंपन्यांक लोहखनिज विक्री करून सुमार २,७४४.८९ कोटी रुपयांचो अतिरिक्त फायदो जोडिल्ल्याचो आरोप आसा.
हाका लागून ह्या प्रकरणांल्या वट्ट गुन्यांवकारी उत्पन्न (Proceeds of Crime) सुमार ५,२३७.८४ कोटी रुपया आशिल्ल्याचो ईडीचो दावो आसा. हो निधी ब्रिटिश व्हर्जिन आयलंड्स आनी सिंगापूरच्या विशेश उद्देश कंपनीं वरवीं (SPVs) भोंवून परदेशांत मालमत्ता खरेदी खातीर वापरिल्ल्याचेंय तपासा वेळार स्पश्ट जालां. ह्या प्रकरणाचो फुडलो तपास सुरू आशिल्ल्याचें ईडीन सांगलां.