भांगरभूंय | प्रतिनिधी
गोंयांत 4200 विद्यार्थ्यांंनी दिली नीट परिक्षा
पणजी: एनआयटी परिक्षेचें केंद्र कुंंकळ्ळी आसतना कांय विद्यार्थ्यांक केंद्राची मेसेज एनआयटी फोंडें अशी आयिल्ल्यान बरीच गैरसोय जाली. धा ते बारा विद्यार्थी पयली फर्मागुडी वचून उपरांत कुंंकळ्ळे नीट परिक्षा दिवपाक गेले. हो घोळ सोडून गोंयांत नीट परिक्षा आडखळे बगर पार पडली. 4200 विद्यार्थ्यांनी नीट परिक्षा दिली.
पेपर फुटीक लागून पयलींची नीट परिक्षा रद्द जाली. पुराय देशांत नीट फेरपरिक्षा आयतारा 21 जूनाक जाली. गोंंयांंत 12 केंद्रांंनी परिक्षा जाली. उत्तर गोंंयांंत 3350 जाल्यार दक्षीण गोंंयांंत 840 विद्यार्थ्यांनी परिक्षा दिली. परिक्षा केंंद्रांंनी सीसीटीव्ही कॅमेऱ्या सयत मोबायल जॅमर्सची वेवस्था आशिल्ली. पुलिसांं सयत सीआयएसएफ जवानांंचो लेगीत बंंदोबस्त आशिल्लो. उत्तर गोंयांत सेंट झेवियर (म्हापशें), संत सोहिरोबानाथ आंबिये म्हाविद्यालय (पेडणें), सरकारी म्हाविद्यालय (सांखळी), रोजरी हायस्कूल (कुजिरा), मुश्टीफंड हायस्कूल (कुजिरा), धेंपो हायरसेकंडरी (कुजिरा), केंद्रीय विद्यालय (आयएनएस मांडवी), केंद्रीय विद्यालय (बांबोळी)
दक्षीण गोंयांत केंद्रीय विद्यालय (कुर्टी फोंडें), एनआयटी (कुंकळ्ळी), केंद्रीय विद्यालय 1 (वर्णपुरी), केंद्रीय विद्यालय 2 (मांगोरहील) ह्या थळांचेर परिक्षा जाली.
परिक्षे खातीर कदंंबा बशींची वेवस्था आशिल्ली. परिक्षे खातीर एनआयटी केंद्राची निवड केल्ल्या कांय विद्यार्थ्यांनी परिक्षा केंद्र म्हूण एनआयटी फोंडें असो मेसेज आयलो. हाका लागून कांय विद्यार्थी पयलीं फर्मागुडयेर गेले. परिक्षा कुंंकळ्ळी आशिल्ल्याचे कळ्ळे उपरांत फर्मागुडी सावन ते कुंंकळ्ळे गेले. हाका लागून तांंकां उशीर जालो. पयलीं एनआयटी फर्मागुडयेर आशिल्ली. आतां एनआयटीचो कुंंकळ्ळी हांंगा कॅम्पस सुरू जाला. मात एनआयटी फोंडें ह्या मेसेजीक लागून घोळ जालो. तशेंच पेडणें परिक्षा केंंद्राचेर वेळ सोंपचे पयलीं उत्तर पत्रिका घेतिल्ल्याची कागाळ कांय विद्यार्थ्यांनी केली.
नेमा प्रमाण आनी खर बंंदोबस्तांत परिक्षा पार पडल्याची म्हायती उत्तर गोंंयचे जिल्होधिकारी अंंकीत यादव हांंणी दिली.
इतले मजगतीं, परिक्षा केंद्रा भायर युवा काँग्रेसीन हेल्प डेस्क स्थापन केल्ले. पियेवपा खातीर उदकाच्या वेवस्थे सयत हेर म्हायती कार्यकर्ते विद्यार्थ्यांक दिताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
