वाग वाठार : खंडपीठाच्या आदेशाक आव्हान दिवपाचें कारण किदें? : कॉंग्रेस
भांगरभूंय | प्रतिनिधी
कोणाचे हेत आसा, ते सरकारान स्पश्ट करचें
पणजी, प्रतिनिधी : रानां जीव तशेंच वागांचे संरक्षण करपाच्या हेतान खंडपीठान म्हादय वाठार ‘वाग वाठार’ म्हूण अधिसुचीत करपाचो आदेश खंडपीठान दिला. खंडपीठाच्या आदेशाची कार्यवाही करपाचें सोडून सरकार आदेशाक सर्वोच्च न्यायालयांत आव्हान दिवपाची तयारी करता. कोणाच्या हेता खातीर वाग वाठाराच्या आदेशाक सरकार सर्वोच्च न्यायालयांत आव्हान दिवपाक सोदता, तें स्पश्ट करचें, अशी मागणी कॉंग्रेसीन केल्या.
कॉंग्रेसीचे म्हणयारे एल्वीस गोम्स हांणी बिरेस्तारा पत्रकार परिशद घेतली. वाग वाठाराच्या आदेशाक सर्वोच्च न्यायालयांत आव्हान दिवपाचो निर्णय सरकारान बेगोबेग स्थगीत करचो, अशी मागणी कॉंग्रेसीन केल्या.
राज्याचें पर्यावरण तशेंच उदकाचो सांबाळ करपा खातीर म्हादयचें उदक वळोवपा सावन कर्नाटकाक आडोवपाची गरज आसा. म्हादय वाठार वाग वाठार जाहीर जालो, जाल्यार गोंयची बाजू सर्वोच्च न्यायालयांत घटमूट जातली. म्हादय तशेंच वागांक वाटोपा खातीर वाग वाठार जाहीर जावपाची गरज आसा. दोन आमदारांच्या हेता खातीर पुराय राज्याच्या फायद्या कडेन तडजोड करप सारकें न्हय अशें गोम्स हांणी म्हणलां. वाग वाठार जाहीर करपाची मागणी पोरणी आसा. केंद्रीय रानां मंत्रालयान हे विशीं गोंय सरकाराक पत्रां लेगीत बरयल्यांत, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
