भांगरभूंय | प्रतिनिधी
कारचालकाक अटक, सोऱ्याचे नशेंत अपघात जाल्ल्याचो दुबाव
म्हापशें, प्रतिनिधीः गोंयांत मजा करपाक येतात, तातूंतले चडशे पर्यटक बियर, सोरो पियेले बगर रावनात. मात तो प्रमाणा भायर पोटांत वता तेन्ना अपघात, दुर्घटना जातात. काल शेनवारा रातीं णवांक सुमार वागातोरा अपघात जालो. तो जावपाक जापसालदार आशिल्लो पर्यटक सोरो पियेल्लो असो दुबाव पुलिसांनी उक्तायला. आतां तो नेमको कितलो पियेल्लो तें ताची वैजकी चांचणी करतकच कळटलें. मात ह्या अपघातांत एके हॉटेल वेवसायीक बायलेक जीव वगडावचो पडलो.
वागातोरा पर्यटक सचिन कुरूप (42, पुणें) जॉली जॉली लेस्टर रिसॉर्टांत देंविल्ल्या आपल्या इश्टाक मेळपाक गेल्लो. सुरक्षा रक्षकान गाडी येतकच गेट उक्ती केली आनी कुरूपाक भितर केल्लो. मात ताणें एचआर 13 जी 1831 क्रमांकाची फोर्ड इन्डेव्हर ही आलिशान गाडी नेटान मुखार व्हेली ती सरळ रिसेप्शन कावंटरांत घुसली. थंय हॉटेलाची धनी रेमेडिया मेरी अल्बुकर्क (57) मोबायल फोनाचेर उलयताली. तिका गाडी येता ते जाणवलें ना…. आनी स्टीलाचें रेलींग मोडून आयिल्ले ते गाडयेचो धपको बसून तिका जाग्यारुच मरण आयलें.
आवाज जाले उपरांत रिसाॅर्टाचे कर्मचारी आनी थंय आशिल्ले पर्यटक धांवून आयले. तांणी पुलिसांकूय म्हायती दिली. हणजुण पुलिसांनी रेमेडिया हांकां म्हापशेंच्या जिल्हो हाॅस्पिटलांत व्हेली. पूण दोतोरांनी तिका मरण आयिल्ल्याचें घोशीत केलें. पुलिसांनी कुरूप हाका अटक केल्या. पुलीस उपनिरीक्षक स्नेहा सावळ आनी हवालदार राजेंद्र पाटील हांणी अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
