भांगरभूंय | प्रतिनिधी
फोंडें, प्रतिनिधी: वंडाळ्यां -धारबांदोड्यां ब्लॅक पँथर दिसलो. अतूल नायक हांच्या घरा लागसारा बसयिल्ल्या सीसी टीव्ही कॅमेर्यांत तो झळकलो. बिरेस्तारा रानां खात्याच्या कुळें कार्यालयाक हे विशीं म्हायती दिले उपरांत कर्मचार्यांनी ह्या वाठारांत वचून पळोवणी केली. फाटले कांय म्हयने ब्लॅक पँथर गांवांत भितर सरून पोशिल्ल्या सुण्यांक खाता, अशें लोकांनी सांगलें.
पयलीं साकोड्डें वाठारांत धुमाकूळ घाल्लो ब्लॅक पँथर आतां वंडाळ्यां गांवांत पावला. फाटल्या कांय म्हयन्यां सावन ताणें १५ सुण्यांची शिकार केल्या. कांय दिसां पयलीं सांजे वेळार सुमार ६ वरांचेर एके व्यक्ती वांगडा आशिल्ल्या सुण्याक ब्लॅक पँथरान व्हेल्लो. तशेंच ४ नोव्हेंबराक रातच्या १.३० वरांचेर अतुल नायक हांच्या घरांत सरिल्लो ब्लॅक पँथर सीसी टीव्ही कॅमेर्यांत दिसला.
अतुल हांणी दिल्ले म्हायती प्रमाण, कांय म्हयन्यां सावन पाळिल्ले सुणे रानवटी जनावरां रातच्या वेळार येवन व्हरतात. ४ नोव्हेंबराक एक ब्लॅक पँथर येवन पाळिल्ल्या सुण्याक घेवन गेल्ल्याचें चित्र कॅमेर्यांत कैद जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
