बंंगळुरूचें विराट जैत

भांगरभूंय | प्रतिनिधी

इंडीयन प्रिमीयर लिगेचे (आयपीएल) 58वे मॅचींत रॉयल चॅलेंजर्स बंगळुरून येजमान पंजाब किंग्साक 60 धांवड्यांनी हारयलो. ह्या जैतान बंगळुरून प्ले ऑफाचे सर्तींतलें आपलें आव्हान कायम राखलें. दुसरे वटेन हे हारीक लागून पंजाब किंग्साचें आव्हान लागींलागीं सोंपिल्ल्यांत जमां जालां. विराट कोहलीन फकत बॅटिंगेंतूच न्हय जाल्यार फिल्डिंगेंत लेगीत जबरदस्त प्रदर्शन करून बंगळुरूच्या जैतांत म्हत्वाचें योगदान दिलें.

बॅटिंगेंत कोहली खेरीत रजत पाटीदार आनी कॅमेरून ग्रीन हाणें बरी साथ दिली, जाल्यार कर्ण शर्मा आनी स्वप्निल सिंग हांणी स्पिन बॉलिंगेच्या नेटार मॅच घुंवडायली.

मोखीचो फाटलाव करपी पंजाबाची सुरवात बरी जाली ना. स्वप्निल सिंगान पयलेच ओव्हरींत प्रभसिमरन सिंग (6) हाका एलबीडब्ल्यू बाद केलो. ते उपरांत जॉनी बॅयरस्टो आनी रायली रुसो हे जोडयेन डाव मुखार व्हेलो. दोगांयनी 31 बॉलांनी 65 धांवड्यांची भागिदारी केली. बॅयरस्टोन 16 बॉलांनी चार चवके आनी एका सक्याचे मजतीन 27 धांवड्यो केल्यो. रुसोन 21 बॉलांनी अर्द शेंकडो पुर्ण करून पंजाबाचें आव्हान कायम दवरपाचो यत्न केलो. कर्ण शर्मान मॅच घुंवडायली. ताणें रुसोक बाद केलो. रुसोन 27 बॉलांनी 61 धांवड्यो केल्यो.

इम्पॅक्ट प्लेयर जितेश शर्मा (5) हाका लेगीत कर्ण शर्मान बोल्ड केलो. ते उपरांत स्वप्निलान लिएम लिव्हिंगस्टोनाक (0) बाद केलो. 14वे ओव्हरींत कोहलीच्या जबरदस्त थ्रोचेर शशांक सिंगाक (37) धांवबाद केलो. 

मोहम्मद सिराजान मॅचीतली आपली पयली विकेट घेतना आशुतोष शर्माक (8) एलबीडब्ल्यू बाद केलो आनी ते उपरांत फर्ग्युसनान सॅम करनाक (22) बाद करून पंजाबाची जैताची आस्त सोंपयली. 

सिराजान आनीक दोन विकेटी घेतना हर्षल पटेल (0) आनी अर्ददीप सिंग (4) हांकां बाद करून पंजाबाचो डाव 181चेर सोंपयलो.

ते आदीं विराट कोहलीन 196चे स्ट्रायक रेटीन धांवड्यो करून टिकाकारांक खर जाप दिली. 2 बाद 43 धांवड्यां वयल्यान विराट कोहली आनी रजत पाटीदार हांणी रॉयल चॅलेंजर्स बंगळुरूक सांबाळ्ळो. ते उपरांत कोहली आनी कॅमेरून ग्रीन हे जोडयेन डाव मुखार व्हेलो आनी पंजाब किंग्साच्या बॉलरांची बॉलींग फोडून काडली.

ते पयलीं पंजाबाचो मुखेली सॅम करनान टॉस जिखून पयलीं बंगळुरूक बॅटींग करपाचें आमंत्रण दिलें. पदार्पण करपी विद्वथ कावेरप्पान बंगळुरूचो मुखेली फाफ ड्युप्लेसीसाक (9) आनी विल जॅक्स (12) हांकां तंबूंत धाडले. पंजाबाच्या खेळगड्यांनी पावर प्लेंत कोहलीक दोन खेपे जीवनदान दिलें. रजत पाटीदाराची एक कॅच सोडली. 10वे ओव्हरीच्या निमाण्या बॉलाचेर सॅम करनान 76 धांवड्यांची भागिदारी फोडली. रजतान 23 बॉलांनी तीन चवके आनी स सक्यांचे मजतीन 55 धांवड्यो केल्यो.

पदार्पण करपी विद्वथान चार ओव्हरींनी 36 धांवड्यो दिवन 2 विकेटी घेतल्यो. कोहली आनी ग्रीन हांणी 42 बॉलांनी 96 धांवड्यांची भागिदारी केली. कोहली 47 बॉलांनी सात चवके आनी स सक्यांचे मजतीन 92 धांवड्यो करून कॅच बाद जालो. अर्शदीप सिंगान ताची विकेट घेतली.

कोहली उपरांत बंगळुरूचे धांवगती ब्रेक लागतलो अशें दिशिल्लें. पूण, खेळपट्टीचेर जम बसयिल्ल्या ग्रीनान आनी फिनीशर दिनेश कार्तिकान 10 बॉलांनी 27 धांवड्यो केल्यो. राहुल चहराक 19वी ओव्हर दिवपाची पंजाबाची रणनिती फसली. बंगळुरून हे ओव्हरींत 21 धांवड्यो केल्यो. 20वे ओव्हरींत व्हड शॉर्ट खेळपाच्या यत्नांत कार्तिक (18) कॅच बाद जालो. हर्षलान चवथ्या बॉलाचेर महिपाल लोम्रोराक (0) बोल्ड केलो. अखेरच्या बॉलाचेर कुरनान ग्रीनाची उत्कृश्ट कॅच धरली. ग्रीनान 27 बॉलांनी पांच चवके आनी एक सक्या सयत 46 धांवड्यो केल्यो आनी बंगळुरून 7 बाद 241 धांवड्यो केल्यो. हर्षलान निमाणे ओव्हरींत तीन विकेटी घेतल्यो.