भांगरभूंय | प्रतिनिधी
-लोखंड भट्टेंत स्फोट, जिवीत हानी जावंक ना
दिवचलः मुस्लीमवाडो दिवचले कैराव रोलींग मिलींत लोखंड वितळावपी भट्टेंत सेगीत चार स्फोट जाल्ल्यान सुमार अर्द किमी. च्या वाठारांतल्या घरांक धपको बसलो. दिवचल उजो पालोवपी दळाचे जवान आनी पुलिसांनी घडणूक सुवातेर धांव घेवन उज्याचेर नियंत्रण मेळयलें. मात हे घडणुकेंत जिवीतहानी जावंक ना.
हे मिलींतल्या लोखंड वितळावपी भट्टेंत एक फाटल्यान एक अशें चार स्फोट जाल्ल्यान अर्द किलाे मिटर वाठारांतली घरां हाल्लीं अशी म्हायती थळाव्यांनी दिली. हे विशींची म्हायती उजो पालोवपी दळाक मेळ्ळे उपरांत दळाच्या जवानांनी घडणूक सुवातेर धांव घेवन उज्याचेर नियंत्रण मेळयले. ह्या प्रकरणा उपरांत थळाव्यांनी खर तिडक उक्तावन जाल्ल्या प्रकरणाची सविस्तर चवकशी करपाची मागणी केल्या.
मुळावे चवकशेंत कसलीच जिवीतहानी जावंक नाशिल्ल्याचे कळटा. पूण दिवचल पुलिसांनी ह्या प्रकरणाची खोलायेन चवकशी करपाची मागणी केल्या. हाचे पयलीं अशा प्रकारचे स्फोट आनी प्रदुशण जाल्ल्यान थळाव्यांनी तिडक उक्तावन ही मील बंद करपाची मागणी केल्ली.
थळावे आमदार डॉ. चंद्रकांत शेट्ये हांणीय थळावे तशेंच कंपनी वेवस्थापना कडेन चर्चा केल्या.
आयज परतून स्फोट जाल्ल्यान लोकां मदीं भिरातचें वातावरण आसा.
दोन वर्सां पयलीं अशाच प्रकारान स्फोट जाल्ले. ते उपरांत उपाय येवजण करपाची मागणी केले उपरांत फॅक्टरीच्या वेवस्थापनान फॅक्टरी सरभोंवतणी पत्राची वणत उबारिल्ली. ते खातीर काल जाल्ल्या स्फोटान आशिकुशीच्या घरांक कांय प्रमाणांत थाकाय मेळ्ळ्या.
उजो पालोवपी दळाच्या जवानांनी उज्याचेर नियंत्रण मेळयलां, पूण कंपनी वेवस्थापनान हे विशीं अदीक म्हायती दिवंक ना. थळावे आमदार डॉ. चंद्रकांत शेट्ये हांणी ह्या प्रकरणाची चवकशी करपाचे आदेश पुलिसांक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
