भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज येजमान गुजरात टायटन्स आनी चेन्नय सुपरकिंग्स ह्या पंगडां मदीं म्हत्वाची मॅच जातली. पयल्या टप्प्यांतले मॅचींत चेन्नय सुपरकिंग्सान गुजराताक हारयिल्लो. हाचो बदलो घेवपाक गुजरात इत्सूक आसतलो. तशेंच निमाण्या चारांतले रेसींत स्वताक कायम राखपाचें आव्हान ताच्या मुखार आसा, तशेंच चेन्नय सुपरकिंग्सा मुखार लेगीत प्ले ऑफांतलो दावो घटमूट करपाचें आव्हान आसतलें.
फाटले खेपे दोनूय पंगड एकामेका आड खेळिल्ले, त्या वेळार साई सुदर्शनाच्या 96 धांवड्यां नेटार गुजरात टायटन्साक व्हड स्कोर उबारून दिवपाक मजत केल्ली. चेन्नय सुपरकिंग्साचे आयचे मॅची खातीर म्हत्वाचे दोन फास्ट बॉलर मथिशा पथिराना आनी मुस्तफिजूर रहमान उपलब्ध आसचे नात. हाचो फायदो सुदर्शन घेवपाक शकता. पोरूं फायनलींत आनी अंदूं पयल्या टप्प्यातले मॅचींत सुदर्शनानूच गुजराता वतीन सगल्यांत चड धांवड्यो केल्ल्यो आनी दोनूय खेपे पथिरानान ताका बाद केल्लो.
चेन्नय सुपरकिंग्साच्या तुषार देशपांडे आनी रवींद्र जडेजा आड सुदर्शन खेळ्ळा आनी दोगांकूय सुदर्शनाक बाद करपाक जमूंक ना. देशपांडे आड सुदर्शनान 214 आनी जडेजा आड 152चे स्ट्रायक रेटीन धांवड्यो केल्यात.
गुजराताचो मुखेली शुभमन गील सध्या फॉर्मांत ना. पूण, देशपांडे आड तो आक्रमक बॅटींग करपाक शकता. देशपांडे आड गिलान 161चे स्ट्रायक रेटीन 58 धांवड्यो केल्यात. पूण, गिलाक फॉर्मांत येवपा पसून आडावपी एक बॉलर चेन्नय कडेन आसा. फास्ट बॉलर शार्दुल ठाकूरान गिलाक तीन खेपे बाद केला.
चेन्नय सुपरकिंग्स अंदूंच्या हंगामांत धांवड्यो करपाक मुखेली ऋतुराज गायकवाडाचेर चड निंबून आसा. हाचें फाटलें मुखेल कारण म्हणल्यार चडशे बॅट्समन धांवड्यो करतना झुजतात.
गुजराता आड चेन्नयचे आंकडे पळयले जाल्यार तांकां परतून एकदा गायकवाडाची गरज पडुये. गायकवाडान लेग स्पिनर राशीद खाना आड 163चे स्ट्रायक रेटीन 108 धांवड्यो केल्यात.जाल्यार आठ डावांनी राशीदान ताका दोन खेपे बाद केला.
फाटल्या हंगामांत गुजराता खातीर बॉलर मोहित शर्मान म्हत्वाची भुमिका वठयिल्ली. ताणें महेंद्रसिंग धोनीक तीन खेपे बाद केल्लो. पूण, अंदूं तो फॉर्मांत दिसना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
