भारता कडल्यान बांगलादेशाचो धूप

भांगरभूंय | प्रतिनिधी

भारताच्या बायलांच्या क्रिकेट पंगडान येजमान बांगलादेशाच्या बायलांच्या पंगडाक पांचवे टी-20 मॅचींत 21 धांवड्यांनी हारयलो. ह्या जैता सयत भारतान पांच मॅचींचे माळेंत बांगलादेशाचो 5-0 असो धूप केलो. राधा यादवाची प्लेयर ऑफ द मॅच आनी प्लेयर ऑफ द सिरीज पुरस्कारा खातीर निवड जाली.

भारतान पयलीं बॅटींग करतना निर्धारीत 20 ओव्हरींनी 5 विकेटी व्हगडावन 156 धांवड्यो केल्यो. ताका जाप दितना बांगलादेशाक 20 ओव्हरींनी 6 बाद 135 धांवड्यां मेरेन मजल मारप शक्य जालें. भारता वतीन टॉप ऑर्डरीन सांघीक कामगिरी केली. ओपनर स्मृती मंधानान 25 बॉलांनी 33, हेमलतान 28 बॉलांनी 37 धांवड्यांची खेळी केली. ते उपरांत भारताची मुखेली हरमनप्रीत कौरान 24 बॉलांनी 30 धांवड्यांचें योगदान दिलें. आक्रमक बॅटिंगेक प्रसिद्ध आशिल्ले रिचा घोषान 17 बॉलांनी 28 धांवड्यो करून भारताक 150 पांवडो हुपून दिलो. बांगलादेशा वतीन राबेया खान आनी निहिदा अख्तर हिणें दरेकी 2 विकेटी घेतल्यो.

157 धांवड्यांचें आव्हान घेवन मैदानांत देंवपी बांगलादेशाक भारताच्या बॉलरांनी थारावीक अंतरान धपके दीत व्हड भागिदारी करपाक दिली ना. भारतान बांगलादेशाची अवस्था एका वेळार 5 बाद 52 अशी केल्ली. बांगलादेशाचो डाव सवाय भितर गुठलायतलो अशें दिशिल्लें. पूण, रितू मोनी आनी शोरिफा खातून हांणी सवे विकेटी खातीर 57 धांवड्यांची भागिदारी केली. ही जोडी भारता खातीर खतरनाक थारपाक शकता अशें दिसता आसतना आशा शोभनान 33 बॉलांनी 37 धांवड्यो करपी रितू मोनीक बाद करून बांगलादेशाची जैताची आस्त सोंपयली. आशा शोभना आनी राधा यादव हाणें दरेकी 2 विकेटी घेतल्यो.

शोरिफान नाबाद 28 धांवड्यो केल्यो. पूण, बांगलादेशाक जैत मेळोवन दिवपाक तिका शक्य जालें ना.

भारतान पयलीं मॅच 44 धांवड्यांनी जिखिल्ली. दुसरे मॅचींत डकवर्थ लुईसाच्या नेमाखाला भारताक 19 धांवड्यांनी जैतिवंत घोशीत केलो. तिसरे मॅचींत 7 विकेटींनी, जाल्यार चवथे मॅचींत परतून एकदा डकवर्थ लुईस नेमा प्रमाण भारत 56 धांवड्यांनी जैतिवंत थारलो. पावसाक लागून ही मॅच फकत 14 ओव्हरींची जाल्ली.