भांगरभूंय | प्रतिनिधी
न्यायालयान पुलिसांक बरेच उजरायले
पणजी : मुंबय उच्च न्यायालयाच्या गोंय खंडपीठान जायते फावटीं आदेश दिवन लेगीत राज्यांत बिनधास्तपणान १० सुवातांचेर रेंव उसपुपाचें काम चालूच आसा. हें याचिकादारान निदर्शनाक हाडून दिलें तेन्ना खंडपीठान आयज पुलिसांक बरेच उजरायले. जे कितें याचिकादारान निदर्शनाक हाडलां तें पुलिसांक दिसना? पुलिसांनी दोळे धापल्यात? कागाळ आयल्या उपरांतूच कारवाय करतले?, अशे प्रस्न न्या. महेश सोनक आनी न्या. वाल्मिकी मिनेझीस हांच्या दोन न्यायाधिशांच्या (द्विसदस्यीय) खंडपिठान पुलीस आनी संबंदीत सरकारी यंत्रणांक विचारलें.
हे विशीं कितें पावलां उबारतले हें १२ डिसेंबर मेरेन म्हासंचालकांनी प्रतिज्ञापत्रका वरवीं खंडपिठाक कळोवचें, अशें खंडपिठान फुडें सांगलें.
‘गोवा रिव्हर सँड प्रोटेक्टर्स नेटवर्क’ ही संघटणा २०१८ वर्सा सावन गोंयच्या न्हंयच्या पात्रांतल्यान बेकायदेशीरपणान रेंव उसपपा आड न्यायालयांत लढटा. मे २०१८ त हे संघटणेन ह्या मुद्द्याचेर बोट दवरून उच्च न्यायालयांत याचिका दाखल केल्ली. राज्य सरकार, खाण, येरादारी, पुलीस, कॅप्टन ऑफ पोर्टचे कप्तान हांकां हे याचिकेंत प्रतिवादी केल्ले. १८ डिसेंबर २०१९ दिसा उच्च न्यायालयान ही याचिका निकालांत हाडून संबंदीत खात्यांक बेकायदेशीर रेंव वेवसाय करप्यांचेर कारवायेचे निर्देश जारी केल्ले. तेन्ना हें सगळें बंद करतले अशें उतर पुलिसांनी दिल्लें. पूण चार वर्सां जालीं तरी हें पुलिसांक आनी सरकारी यंत्रणांक बंद करपाक जावंक ना. ह्या मुद्यार बोट दवरून आतां याचिकादारान उच्च न्यायालयांत अपमान याचिका दाखल केल्या.
पुलीस महासंचालक आनी राज्याचे मुखेल सचीव हांकां ह्या सप्तकांत बसका घेवन हें सगळें बंद करपा खातीर बेगीनूच कितेंय उपाय करचे अशें उच्च न्यायालयाच्या द्विसदस्यी खंडपीठान म्हणलां.
सुनावणे वेळार याचिकादारान तिसवाडी, फोंडें, पेडणें आनी दिवचल म्हालांतल्या न्हंयांनी धा सुवातांचेर बेकायदेशीर रेंव उसपप सुरू आशिल्ल्याचें पुराव्या सयत निदर्शनाक हाडून दिलें. तेन्ना दोन न्यायाधिशांच्या (द्विसदस्यीय) खंडपीठान पुलीस आनी सरकारी यंत्रणांक बरेंच धारेर धरले.
न्यायालयाचो अपमान केला म्हणून पुलीस म्हासंचालकांक न्यायालयांत आपोवपाचो विचार आशिल्लो. सरकारी वकिलांनी बाजू मांडिल्ल्यान सध्या तशें करूंक ना. हे सगळें तिडक येवपा सारकें आशिल्ल्याचें न्यायाधिशांनी ह्या वेळार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
