राष्ट्रीय काँग्रेस समिती वेंचली, गिरीश चोडणकार हांची स्थायी निमंत्रीत म्हूण नेमणूक

भांगरभूंय | प्रतिनिधी

पणजी, प्रतिनिधी : काँग्रेस पक्षान आपले नवी राष्ट्रीय कार्यकारी समिती जाहीर केल्या. तातूंत कांय बदल केल्यात. गोंय राज्य काँग्रेस समितीचे आदले अध्यक्ष गिरीश चोडणकार हांचो समितीचेर कायमचे (स्थायी) निमंत्रीत म्हूण नेमणूक केल्या. ते खातीर गोंय काँग्रेस फुडाऱ्यांनी श्री. चोडणकार हांकां परबीं भेटयल्यांत.

फुडल्या वर्सा लोकसभा वेंचणूक जावपाची आसा, तशेंच अंदूं कांय राज्यांनी विधानसभा वेंचणुको जातल्यो, ते खातीर ही नवी समिती स्थापन केल्या. आयज ट्वीट करून काँग्रेसीन ही समिती जाहीर केली. भलायकेक लागून पक्षाच्या कामा पसून निवृत्त जावपाक सोदपी सोनिया गांधी हांचो आसपाव हे समितींत आसा.

हालींच्या कांय म्हयन्यांनी काँग्रेसीचेर काँग्रेस फुडारीच टीका करपाक लागल्यात. काँग्रेसीचेर बेजार आशिल्ल्या शशी थरूर आनी आनंद शर्मा हांकां समितीचेर घेतल्यात. काँग्रेस अध्यक्ष मल्लिकार्जुन खडगे हांची काँग्रेस समिती आनी हे नवे समितींत व्हडलोसो फरक ना. खडगे हांणी कांय दिसां सावन सोनिया आनी राहुल गांधी वांगडा बसका घेवन ही नवी समिती तयार केल्या, अशें काँग्रेस सुत्रांनी सांगलें.

नवे समितींत मल्लिकार्जुन खरगे, सोनिया गांधी, राहुल गांधी, अधीर रंजन चौधरी, प्रियंका गांधी, मनमोहन सिंग, ए के अँटनी, अंबिका सोनी, दिग्विजय सिंग हांचे सयत वट्ट 39 फुडाऱ्यांचो आसपाव आसा. सचिन पायलट, शशी थरूर, अशोक चव्हाण, दीपक बावरिया, गौरव गोगोय, नासिर हुसेन, दीपा दास मुन्शी, पवन खेरा, सुप्रिया श्रीनेत्र आनी अलका लांबा हांचींय नांवां हे समितीचेर आसात. 32 स्थायी निमंत्रित, 9 विशेश निमंत्रित, युवक काँग्रेस, एनएसयूआय, महिला काँग्रेस आनी सेवादल अध्यक्षांकूय हे समितीचेर घेतल्यात.