भांगरभूंय | प्रतिनिधी
पुराय विश्वांतल्या हिंदू समाजाचो आत्मसन्मान, आत्मस्वर आशिल्ल्या प्रभू रामचंद्राचो जल्मदीस म्हणल्यार रामनम गोंयांत व्हड भक्तीभावान मनयतात. फक्त रामाच्याच देवळांनी न्हय, तर चडशा देवळांनी ती जाता. मारुतीच्या देवळांत तर रामनम चुकनासतना मनयतात. अंदूं रामनम बुधवार १७ एप्रीलाक आयल्या. गोंयचीं देवळां ह्या उत्सवान पावन जातलीं.
रामनमीक खास करून रामाचें देवूळ रोजांच्या लांब माळांनी आनी लायटींनी सजयतात. देवूळ म्हणल्यार श्रद्धेचें कुळार. ते दीस गर्भकुडींतली रामाची मूर्ती सजयतात. तिका रेशमी काठपदरी सोवळें न्हेसयतात. आंगार अलंकार घालतात. गळ्यांत फुलांचे हार. रामाचे कुशीक देखणी सीतामाई पळोवन दोळे दिपून वतात. धर्नुधारी, एकवचनी, एकपत्नी रामाचें दर्शन घेवप म्हणल्यार पुण्य लाभप.
चैत्र शुद्ध नम ही रामनम. ह्या दिसा राम जल्मल्लो. रामाच्या देवळांनी णव दीस उत्सव चलता. रामायणाचें पारायण, कथा, किर्तन नमी दिसा दनपरां बारा मेरेन जाता. मागीर रामाक पाळण्यांत घालतात. तांची ल्हानशी पंचधातूची मुर्ती मखमली कपड्यार दवरतात. तिका हळद, कुकूम लायतात. फुलां घालतात. पाळण्याक रसमी दोरी बांदिल्ली आसता. ती ओडून ल्हवू ल्हवू पाळण्याक झोके दितात. खास करून बायलो. मागीर तीं पाळणो गीत म्हणटात. बाळा जो जो रे कुळभूषणा। दशरथनंदना। निद्रा करि बाळा मनमोहना। रामा लक्षुमणा॥धृ॥ पाळणा लांबविला अयोध्येसी। दशरथाचे वंशी। पुत्र जन्मला हृषीकेशी। कौसल्येचे कुशी॥१॥… हें गीत कानार पडलें काय मन धादोस जाता. जण एकल्याच्या ओंठार ‘सीयावर रामचंद्र की जय’ येता. ‘जऽऽऽय श्रीराम’ अश्यो घोशणा सगले भक्त दितात.
रामनमीच्या दिसा देवळांतलें वातावरण मंगलमय, भक्तीमय आसता. शेनाय- चौघुड्याचें सूर लोकांक मोनेळ घालतात. मनीस दुख्ख, तणाव, चिंता विसरून वता. सगले रघुपती राघव राजाराम, पतित पावन सीतारामाच्या भजनांत गुंग जातात. निवैद्य म्हणून खास प्रसाद करतात. चडश्या देवळांनी महाप्रसाद आसता. रातच्या वेळार गांवचे तरणाटे स्वता बसयिल्लें नाटक करतात वा भाड्यान नाटक हाडटात. चडशे कडेन दशावतारी नाटक जाता.
कसलोय उत्सव भक्तीभावान, एकचारान मनयलो जाल्यार ताचें गोड फळ रोखडेंच मेळटा.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
