रस्ते सुदरनात तो मेरेन आपूण भिक्षा मागून संबंदीत खात्याक पयशे दितलों : चोडणकार
भांगरभूंय | प्रतिनिधी
पेडणें, प्रतिनिधी ः सध्या शारांनी स्मार्ट सिटीचें काम चालू आसा. कांय कडेन कामां पुराय जालीं जाल्यार कांय कडेन तीं चालू आसात. तशेंच राज्यांतले रस्ते दुरुस्त करपाचें काम फाटल्या कितल्याश्याच म्हयन्यां सावन सुरु आसा. कांय कडले रस्ते दुरुस्त केल्ले परतून इबाडले, रस्त्यार फोंडकुलां पडल्यांत. हाचे त्रास वाहनां चलोवप्यांक जातात आनी ताका लागून अपघात जातात. राज्यांत रस्त्याची अशी परिस्थिती आसून लेगीत हांचे कडेन संबंदीत खाते आडनदर करता, अशें पेडणेचे एक नागरीक सुर्यकांत चोडणकार हांणी सांगलें.
न्हंयबाग- पेडण्यां रस्त्याचेर पडिल्ल्या फोंडकुलां लागून अपघात जाताले. हाचे कडेन सरकार आनी संबंदीत खातें दुर्लक्ष करतालें. देखून सुर्यकांत चोडणकार हांणी रस्ते सुदरनात तो मेरेन आपूण भिक्षा मागून संबंदीत खात्याक पयशे धाडटलों, अशी घोशणा कांय दिसां पयलीं केल्ली. हाका लागून आयज सकाळींच बांदकाम अधिकाऱ्यांनी ह्या रस्त्या वयले फोंड पुरोवपाचें काम सुरू केलें. ह्या वेळार चोडणकार हे हजर आशिल्ले. तांकां जायत्या लोकांनी तेंको दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
