भांगरभूंय | प्रतिनिधी
कोविडाच्या काळांत लोकांक रग्ताची गरज जाय पडटली. प्लास्मा जाय पडटालो. त्या वेळार आमी ही सेवा सुरू केल्ली. त्या काळांत आमकां खूब त्रास जाले, मात त्या त्रासांचें बरें फळ आयज मेळटा.
आयतारची मुलाखत
रक्तदान हें श्रेश्टदान. आपणें रगत दिल्यार तें लोकांचो जीव वाटोवपाक शकता. हे भावनेंतल्यान कितलेशेच जाण रक्तदान करतात. ताचो लाव तांचेय भलायकेक जाता अशें डॉक्टर सांगतात. अशा बऱ्या कामाक उर्बा दिवपा खातीर फोंडेंचो नागरीक सुदेश नार्वेकार हांणींय पावल घालें आनी सार्थक फांवडेशन हे संस्थेंतल्यान तांणी आतां मेरेन 233 रक्तदान शिबिरां गोंयभर घडोवन हाडलीं. तांणी स्वता 106 फावट रक्तदान करून दुसऱ्यांक उर्बा दिल्या. अश्यो संघटना जेन्ना रक्तदान शिबिरां आयोजीत करतात, तेन्ना आमच्या खाजगी आनी सराकारी हॉस्पिटलांच्या ’ब्लड बँकां’क रत्काची सांठवण करपाक मेळटा आनी गरजेवंतांक तें मेळटा. हे विशीं आमी सुदेश नार्वेकार हांचे कडेन भासाभास करून हाची चड म्हायती घेवपाचो यत्न केलो.
० तुमच्या ‘सार्थक फांवडेशना’ मार्फत रक्तदान शिबिरां सुरू करपाचें कित्याक थारायलें?
– आमी समाजीक मळार वावुरतालेच. समाजाक मदत करपाची आमची मोख आसा आनी हे खातीर आमी समाजकार्य करतना एक एक पावल मारत गेले. तातूंतच रक्तदान शिबिरां आयोजीत करपाचें थारायलें, कित्याक तर दुयेंतींक जेन्ना रग्ताची गरज पडटा तेन्ना तांच्या सोयऱ्या दायऱ्यांचे हाल जातात. रगत सोंपेणान मेळ्ळ्यार दुयेंतीचेरूय बेगीन उपचार जातात. हे खातीर आमच्या हॉस्पिटलांनी रक्ताचो सांठो आसप गरजेचें. ते खातीर आमी हें पावल मारलें आनी आतां ताका प्रतिसाद बरो मेळटा.
० लोक स्वता जावन रक्तदान करपाक येतात, काय तांकां मनोवचे पडटात?
– आमकां सुरवातेक जाय तसो प्रतिसाद मेळनाशिल्लो. म्हुणल्यार एका शिबिराक 15 ते 20 रक्तदाते येताले. मात आतां हो आंकडो बरोच वाडला. ताचें फाटलें कारण म्हणल्यार सरकारी पांवड्यार जागृताय तर जाताच, त्या भायर आमीय जागृताय करतात. हे खातीर लोक आतां आपूण जावन येतात आनी रक्तदान करतात.
० सरकार आपले पद्दतीन जागृताय करता, पूण तुमी कशे तरेन करतात?
– हांव स्वता महाविद्यालयांनी वचून भुरग्यांक हे विशींचें म्हत्व सांगतां. तांकां रगत कित्याक दिवप हें पटोवन दितां. तांकां पटलें म्हुणटकच ते तयार जाता. आनी अखेरेक ताचो लाव तांचे भलायकेक जाता. त्या भायर आमी सोशल मिडियाचोय वापर हे खातीर करतात. हे खातीर आतां आमच्या शिबिरांनी चड रक्तदाते येवंक लागल्यात.
० तुमी ही सेवा केन्ना सुरू केल्ली?
– कोविडाच्या काळांत लोकांक रग्ताची गरज जाय पडटली. प्लास्मा जाय पडटालो. त्या वेळार आमी ही सेवा सुरू केल्ली. त्या काळांत आमकां खूब त्रास जाले, मात त्या त्रासांचें बरें फळ आयज मेळटा. आमी समाजाक मदत करूंक शकतात ही खोस मेळटा.
० रक्तदान शिबिरां आयोजीत करचे पयलीं तुमी खंयच्या हॉस्पिटला कडेन संपर्क सादतात?
– आमी पांच हॉस्पिटलां वांगडा काम करतात, तातूंत व्हिक्टर हॉस्पिटल, मणिपाल, हॉस्पिसियो, आझिलो आनी गोंय वैजकी महाविद्यालयाचो आसपाव आसा. आमी तांचे कडेन संपर्क सादतकच तांचे दोतोर आनी हेर कर्मचारी येतात. उपरांत आमी शिबिरांत आयिल्ल्या रक्तदात्यांचें रगत काडून तांकां तांणी परत रगत जावचें म्हूण कितें खावचें ते विशींची म्हायती दितात.
० आतां मेरेन तुमचे कडेन कितले रक्तदाते नोंद जाल्यात?
– फाटल्या पांच वर्सांत आमचे कडेन सुमार तीस हजार रक्तदाते नोंद जाल्यात. आमचे खातीर ही एक खूब व्हड गजाल आसा.
० तुमी हीं शिबिरां घडोवन हाडपा खाती पयशांची वेवस्था कशी करतात?
– आमचे जे वांगडी आसात, ते वर्साक पयशे काडटात आनी तातूंतल्यान आमी ह्यो कार्यावळी आंखतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
