युट्युबाचेर पळोवन केली डिलिव्हरी: बायलेक रक्तस्रावान मरण
भांगरभूंय | प्रतिनिधी
चेन्नय, खबरां संस्था: आमच्या देशांत लाखांनी लोक युट्यूबाचे भकीक पडलां. ताचे वयली म्हायती वाचून बरेच लोक कितें कितें प्रयोग करीत आसतात. तामिळनाडूंत अशीच एक धक्को दिवपी घडणूक उजवाडाक आयल्या. हांगा युट्युबाचेर पळोवन एके बायलेचो घोव घरांतूच तिची डिलिव्हरी करतालो. रक्तस्राव जाल्ल्यान ते बायलेक आपलो जीव वगडावचो पडलो. ही घडणूक २२ ऑगस्टाक कृष्णगिरी जिल्ह्यांत घडली.
वैजकी अधिकार्यांनी दिल्ले म्हायती प्रमाण, तामिळनाडू, पुलियामपट्टींत रावपी लोगनायकी (२७) नांवांचे बायलेक मरण आयिल्ल्याची कागाळ पुलिशेंत दाखल केल्या.
लोगनायकी हिका कळो येवपाक सुरू जाले उपरांत तिचो घोव मधेश हाणें घराच तिची डिलीव्हरी करपाचो यत्न केलो. कांय वेळार तिणें एका चल्या जल्म दिलो. पूण गर्भाक जोडिल्ली नाळ सारकी कापूंक नाशिल्ल्यान रक्तस्राव जावन लोगनायकी बेशुद्ध जाली.
बेशुद्ध जाल्ल्या तें पळोवन तिका रोखडीच मुळाव्या भलायकी केंद्रांत व्हेली. पूण तिका मरण आयलें. तिच्या घरकारान यूट्यूब पळोवन डिलीव्हरी करपाचो यत्न केल्ल्याचें मुळाव्या तपासांत कळून आयलां. आनीक तपास चालू आसा. ते बायलेच्या घोवा आड पुरावे मेळ्ळ्यार पुलीस ताका अटक करपाक शकता.
यूट्यूब पळोवन मेळयली म्हायती
मरण आयिल्ले बायलेच्या घोवान युट्यूब पळोवन ‘घरा डिलिव्हरी कशी करची?’ हाची अर्दवट म्हायती एकठांय केल्ली. पूण ताच्या ह्या अर्दवट ज्ञानाक लागून बायलेक आपलो जीव मात वगडावचो पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
