युक्रेन

भांगरभूंय | प्रतिनिधी

युक्रेन हो पूर्व युरोपांतलो एक देश. 1991 मेरेन हो देश सोवियत संघाचो वांगडी आशिल्लो. 1991 वर्सा युक्रेन तशेंच सोवियत संघाचो भाग आशिल्ले 15 देश स्वतंत्र जालें. युक्रेनाचे उत्तरेक बेलारूस, पुर्वेक रशिया, दक्षीण-पश्चिमेक मोल्दोवा आनी रोमानिया, आनी पश्चिमेक हंगरी, स्लोवाकिया आनी पोलंड हे देश आसात. कर्च सामुद्रधुनी युक्रेन आनी रशियेक वेगळे करता.
शारां – क्यीव ही युक्रेनाची राजधानी आनी सगळ्यांत मोटें शार. संवसारांतल्या पोरण्या शारां मदीं क्यीव ह्या शाराचो आसपाव जाता. युक्रेनाचे संस्कृतीक, प्रशासकी आनी अर्थीक नदरेन क्यीव शार म्हत्वाचें थरलां. उडेसा ह्या शाराचेर युरोपी संस्कृतायेचो प्रभाव दिसता. ऑपेरा हो नाट्य प्रकार पळोवपाक ह्या शारांत तशेंच युक्रेनांतल्या हेर जायत्या शारांनी मोटे मोटे नाट्यगृह बांदल्यात. खार्कीव, दोनेत्स्क, ल्वीव, मारियुपोल, लुहान्स्क, पोल्टावा हीं युक्रेनांतलीं हेर कांय म्हत्वाचीं शारां.
भास – युक्रेनचे चडशे लोक युक्रेनियन ही भास उलयतात. ही भास बरोवंक सिरिलिक वर्णमाळेचो वापर करतात. रशियन आनी बेलारुशियन ह्या स्लावीक भास कुळांतली युक्रेनियन भास रशियन तशेंच पोलीश भाशे कडेन खूब लागीं आसा. युक्रेनांतले जायते लोक पोलीश, यिडीश, रसीन, बेलारुशियन, रोमानियन वा मोल्दोवन, बल्गेरियन, टर्कीश वा हंगेरियन, रशियन ह्यो भाशा उलयतात.
खाणां-जेवणां – युक्रेनच्या लोकांक खाणां-जेवणांची खूब आवड. युक्रेनचीं खाणां-जेवणां पूर्व युरोपी खाणा संस्कृतायेचेर आदारिल्लीं आसात. तुर्की, पोलीश आनी क्रिमियन अशा वेगवेगळ्या खाणांचो प्रभाव युक्रेनांतल्या खाणांचेर दिसता. पोर्क, बीफ, नुस्तें, गाजर, बटाट हांचो वापर युक्रेनांतल्या खाणांनी चड प्रमाणांत जाता. बॉर्शच, सेलो, कोवबासा, वॅरॅनिकी, डॅरनी, पास्का, कपजनिएक हे युक्रेनांतले कांय फामाद पदार्थ. पॅनकेक आनी ऍपलपाय हे गोड पदार्थूय युक्रेनांत मोट्या प्रमाणांत मेळटात.
शेती – दर्जेदार माती आनी फावो तें हवामान आशिल्ल्यान युक्रेनांतले लोक वेगवेगळें पीक रोयतात. बटाट, सूर्यफूल, शुगर बिट्स, गंव, मको आनी हेर भाजयो तशेंच कड्डणां युक्रेनांत जातात. साकर आनी तेलाची निर्मिती करपी उद्देग ह्या देशांत आसात. ह्या देशांत गोरवांक आनी दुकरांक पोसून दूद आनी हेर उत्पाद तयार करतात. हे लोक कुकडांक, टर्की (विलायती कोंबी), बदकांक लेगीत पोसतात.
उद्देग – युक्रेनांत मँगनीज आनी लोह खनिजाचे मोटे सांठे आसात. ताका लागून युक्रेन देश स्टीलाचे निर्मितींत आघाडीचेर आसा. अवजड माक्नां, मशिनां आनी येरादारी साधनांचें उत्पादन ह्या देशांत जाता. हाचे सयत थर्मल पावर स्टेशनां आनी कोळशाच्यो खणी ह्या देशांत आसात. ह्या देशांत सैमीक वायू आनी पेत्रोलियम निर्मिती जाता. युक्रेन-रशिया झूज सुरू जाल्ल्यान युक्रेनांतले अर्थवेवस्थेचेर मोटो परिणाम जाला.
युक्रेन-रशिया झूज – युक्रेन हो देश नाटो म्हणल्यार अमेरिकेच्या नॉर्थ अटलांटीक ट्रिटी ऑर्गनायजेशन हे संघटनेचो वांगडी जावपाक सोदता. हाचे वयल्यान रशिया आनी युक्रेना मदीं ताण निर्माण जाला. 2014 वर्सा सावन रशिया आनी युक्रेना मदीं झूज चालू आसा. फेब्रुवारी 2022 सावन हें झूज चड हिंसक जालें. युक्रेनाचें निशस्त्रीकरण आनी नाझीवाद मुक्त करूंक रशियेचे राष्ट्राध्यक्ष व्लादीमीर पुतीन हांणी खासा लश्करी कारवायेचो आदेश दिलो. रशियेन युक्रेनाचेर मिसायल हल्लो करून युक्रेनांतल्या कितल्याशाच वाठारांची नासधूस केली. ह्या झुजांत युक्रेन तशेंच
रशियेंतल्या कितल्याशाच सैनिकांक आनी नागरिकांक मरण आयलां. अजुनूय हें झूज चालू आसा.

स्नेहा सबनीस
9923633789