भांगरभूंय | प्रतिनिधी
नवी दिल्ली, खबरां संस्था: भारताचे लोकसंख्येंत हालींच्या वर्सांनी नेटान वाड जाल्या. वांगडा अन्नधान्याची उणाव, विवीध सुविधांचो उणाव आनी हेर जायत्यो गजाली जाचे कडेन आडनदर करूं येना अश्या गजालींक लागून सामान्य लोकांक खूब त्रास सोंसचे पडटात. म्हारगाय नियंत्रणांत हाडपा खातीर सरकार जायत्यो येवजण्यो चालीक लायता. अशीच एक येवजण ‘भारत आटा’ ही येवजण सरकारान हालींच सुरू केल्या. तिचे खाला सरकार सामान्य लोकांक २७. ५० रुपया किलो दरान पिठाची पुरवण करतलें. फाटल्या कांय वर्सां सावन गंवाचें दर वाडिल्ल्यान ही येवजण केंद्रान सुरू केल्या.
केंद्रीय गिरायक वेव्हार, अन्न आनी भौशीक वितरण मंत्री पीयूष गोयल हांणी १०० मोबायल व्हॅनांक पांचवो बावटो दाखोवन येवकार दिलो. ह्या अनुदानीत गंवाच्या पिठाची पुरवण हे व्हॅनींतल्यान देशांतल्या वेगवेगळ्या शारांनी जातली. गांवांगांवांनी सामान्य लोकां मेरेन पावपा खातीर केंद्रीय भंडार, NAFED आनी NCCF हांच्या सहकारी संस्थां वरवीं आनी किरकोळ विक्री केंद्रां वरवीं हे येवजणेचें वाटप करतले.
केंद्र सरकाराच्या अनुदानांतल्यान देशभरांत पुरवण करपा खातीर केंद्रीय भंडार, NAFED आनी NCCF सहकारी संस्थांक आनी किरकोळ विक्री केंद्रांक २१.५० रुपया/ कि.ग्रॅ. दरान २.५ लाख मेट्रीक टन गंव दिला. फकत गंव न्हय तर दाळ आनी हेर वस्तूय टप्प्याटप्प्यान वांटून दितले, अशें पीयूष गोयलान कार्यावळी वेळार जाहीर केलें. म्हारगाय नियंत्रणांत हाडपाक सरकार सदांच तयार आसा अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
