भांगरभूंय | प्रतिनिधी
म्हापशें, प्रतिनिधी ः म्हापशेंच्या बाजारांतल्या शकुंतलेच्या पुतळ्याच्या वाठारांत पालिकेन बॅरीकेड्स घातल्यात. हाचो त्रास दुकानदारांक तशेंच गिरायकांक जावपाक लागिल्ल्यान ते काडपाची मागणी म्हापशें वेपारी संघटणेन केली. ते प्रमाण दिवाळी मेरेन बॅरीकेड्स काडपाची गवाय नगराध्यक्ष प्रिया मिशाळ हांणी दिली.
१ नोव्हेंबर सावन पालिका मुख्याधिकारी चंद्रकांत शेटकर हांच्या आदेशा प्रमाण पालिका कर्मचार्यांनी बाजारांत हे बॅरीकेड्स घातिल्ले. मुख्याधिकार्यांनी आश्वासन दिवन लेगीत ही वाट मेकळी जावंक नाशिल्ली. ताका लागून आयज सचिव सिध्देश रावत हांचे अध्यक्षते खाला वेपारी संघटणेच्या पदाधिकार्यांनी बाजारांत बसका जाली. बॅरिकेड्स काडिना जाल्यार फाल्यां सावन बाजार बंद करपाचो निर्धार ह्या वेळार केलो. उपरांत दनपरां पालिका कार्यालयांत संघटनेच्या शिष्टमंडळान नगराध्यक्ष प्रिया मिशाळ हांची भेट घेतली. ह्या वेळार उपनगराध्यक्ष विराज फडके हाजीर आशिल्ले.
कांय वेपार्यांनी बेशिस्त पार्कींगा विशीं मुख्याधिकार्यां कडेन कागाळ केल्ली. ताका लागून हे बॅरिकेड्स घातिल्ले. वेपारी संघटणेचे मागणे प्रमाण आनी दिवाळेक लागून ही वाट मेकळी करपाचो निर्णय घेतला अशी म्हायती प्रिया मिशाळ हांणे दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
