म्हापशें बाजारपेठ सुदारपाक राजकी इत्साशक्तीचो उणाव

भांगरभूंय | प्रतिनिधी

वेपारी संघटणेचो आरोप; नगराध्यक्षांक समस्यांचें निवेदन

म्हापशें: राजकी इत्साशक्तीच्या उणावाक लागून बाजारपेठेंतली स्थिती दिसान दीस पेड्डेर जायत आसा. फाटल्या 20 वर्सांत पालिकेंत 50 परस चड नगराध्यक्ष आनी मुख्याधिकारी बदल्ले. पूण तांचे मदीं इत्साशक्तीचोच उणाव आशिल्लो. मार्केटांतल्या साधन सुविधा आनी विक्रेत्यांक चोख स्थितींत दवरपा सयत अनियंत्रीत विक्रेत्यांचेर चेपण दवरपा खातीर टावन वेंडींग समितीचे नेमणुके कडेन हेतुपुरस्सर आडनदर केली असो आरोप करून पालिके कडल्यान आतां आस्वासनां नाकात, कृती जाय अशी मागणी म्हापशें वेपारी संघटणेन केल्या.

आयतार दिसा बाजारपेठेंत वचपाक उजो पालोवपी दळाचे गाडयेक आडखळ निर्माण जाल्ली. हे फाटभुंयेर म्हापशें वेपारी संघटणेचे अध्यक्ष श्रीपाद सावंत हांच्या फुडारपणा खालच्या शिश्टमंडळान नगराध्यक्ष प्रिया मिशाळ हांची भेट घेवन तांकां निवेदन सादर केलें. ह्या वेळार सचीव सिद्धेश रावत, भांडारी जितेंद्र फळारी, जोड भांडारी पांडुरंग सावंत, गीतेश डांगी, वल्लभ मिशाळ आनी उपनगराध्यक्ष विराज फडके आनी नगरसेवक सुशांत हरमलकार हाजीर आशिल्ले.

ह्या वेळार संघटणेन नगरपालिकेचे दर्जोहीन प्रशासन, बाजारपेठेंतल्या अनियंत्रीत विक्रेत्यांचे संख्येक लागून आपत्कालीन सेवांच्या वाहनां सयत चलून वचपी लोकांक जावपी आडखळ, बंद स्थितींत आशिल्लीं शौचालयां, शौचालय चालका कडल्यान लोकांची जावपी लुबाडणूक, पार्कींग, फुटपाथा वेले दिवे, पोरण्यो वीज वाहिन्यो हे सारके प्रस्न उपस्थीत करून तिडक उक्तायली.

संघटणेचे अध्यक्ष श्रीपाद सावंत हांणी म्हणलें, मदेकांत आपत्कालीन सेवांच्या वाहनांक मार्केटांतल्या भिरतल्या रस्त्यांचेर मेकळेपणान यो-वच करूंक मेळचें हे खातीर पळोवणी केल्ली. तेन्ना पालिकेन विक्रेत्यांक गरजेच्यो त्यो सुचोवण्यो केल्यो. पूण आयतारा उजो पालोवपी दळाच्या बंबाक मार्केटांत प्रवेश करूंक मेळ्ळो ना. रस्त्यार फळ विक्रेत्यांनी मेजून दिल्ले सुवाते परस चड सुवात आडावन दवरल्या. कांय जाणांनी प्रवेश दाराचेरूच आपलें बस्तान मांडलां. वेळावेळार पालिके कडेन हो प्रस्न मांडलो, पूण कृती शुन्य आशिल्ल्याची खंत तांणी उक्तायली.

सिद्धेश रावत हांणी म्हणलें, आयतारा उज्याची घडणूक घडली, पूण उजो तितलो उग्र नाशिल्लो. नाजाल्यार तीन दुकानांचो गोबर जावपाचो. मार्केटांतल्यो वीज वाहिन्यो पोरण्यो जाल्ल्यान व्हड दुर्घटणा घडपाची शक्यताय न्हयकारूं येना. पालिकेन वीज खात्या कडेन फाटपुरवण करून ह्यो वाहिन्यो बदलच्यो. मटकी बाजारा कुशीक शौचालयाचो कंत्राटदार चड शुल्क घेता. पालिकेन हातूंत हस्तक्षेप करचो अशी मागणी तांणी केली.

पांडुरंग सावंत हांणी म्हणलें, वेपारी संघटणे कडल्यान पालिकेक हाचे पयलीं खूबशीं निवेदनां दिल्यांत. पूण अंमलबजावणी जायना. आतां मेरेन खूबशे मुख्याधिकारी आनी नगराध्यक्ष बदल्ले. पूण बाजारांतली समस्या आसा तशीच आसा. अनियंत्रीत विक्रेत्यांची संख्या वाडल्या. ह्या विक्रेत्यां कडेन वळखपत्रां नासतात. अतिक्रमण करप्यांचेर पालिका कारवाय करपाक फाटीं फुडें सरता. ही स्थिती वेळारूच सुदारली ना जाल्यार वेपारी आक्रमक जातले अशी शिटकावणी तांणी दिली.

मार्केटांतल्या समस्यांचें निवारण करपा खातीर पालिका वचनबद्ध आसा. फळ विक्रेते बसतात ते लेनींत आपत्कालीन सेवांच्या वाहनांक वचूंक मेळचें हे खातीर 4.60 मिटर सुवात सोडल्या. तशेंच विक्रेत्यांक परतून सुवातांचें चिन्नांकन करून सुचोवणी दिल्यात. आयतारा मार्केटांतले घडणुके उपरांत परतून एकदां आमी जोड पळोवणी करतले अशें नगराध्यक्षा प्रिया मिशाळ हांणी सांगलें.