भांगरभूंय | प्रतिनिधी
उच्च न्यायालयाचो निर्णय, प्रा. जयराम केरकार हांणी घाल्ली याचिका
पणजी, प्रतिनिधी : ज्येष्ठते प्रमाण शिक्षकाक बढती न्हयकारिल्ले खातीर उच्च न्यायालयान मुळगांवच्या ज्ञानप्रकाश उच्च माध्यमीक विद्यालयाचे सध्याचे प्राचार्य लक्ष्मीकांत परब हांची नियुक्ती रद्द केल्या. ते सुवातेर नवी नियुक्ती जाय मेरेन याचिकादार जयराम केरकार हांचे कडेन प्राचार्य पदाचो दिवचो, अशें म्हणलां. जयराम केरकार हे सध्याच्या प्रार्चाया परस चड शिकल्यात, अशेंय न्यायालयान म्हणलां.
आदले येरादारी मंत्री स. पांडुरंग राऊत हांचें हें विद्यालय जावन आसा. जयराम केरकार हे त्या उच्च माध्यमीक विद्यालयांत प्राध्यापक आसात. दिवचल तालुक्यांत आशिल्ल्या ज्ञानप्रकाश उच्च माध्यमीक विद्यालयाच्या वेवस्थापनान जयराम केरकार हांच्या ज्येश्ठत्वा कडेन आड नदर करीत ते बडटी खातीर योग्य ना अशें म्हणून दुसर्या शिक्षकाक बडटी दिल्ली. याचिकादारानयाचिका दाखल केले उपरांत उच्च न्यायालयान केरकार हे चड पात्र आसात आनी ते बडटी खातीर योग्य आशिल्ल्याचें नमूद केलां.
2007 वर्सा सेगीत 28 वर्सां विद्यालयाक शिक्षक म्हणून सेवा दिवपी जयराम केरकार हांची ज्येश्ठता निश्चीत केल्ली. पूण, वेवस्थापनान तांची बडटी न्हयकारून परब हांकां ती दिली. ह्या सगळ्या प्रकाराक लागून उच्च न्यायालयांत याचिका दाखल करपी जयराम केरकार हांकां हे केसी खातीर आयिल्लो खर्च म्हणून वेवस्थापनान 25 हजार रूपया तांकां दिवचे, अशे आदेशूय न्यायालयान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
