मुर्डी – खांडेपाराच्या बांधाचें काम बंद करचें
भांगरभूंय | प्रतिनिधी
१४४ कलमूय काडपाची गांवकारांची मागणी
फोंडें, प्रतिनिधी : मुर्डी – खांडेपारा १४४ कलम लागू करून काम सुरु केल्ल्यान ग्रामस्थांनी पंचायत कार्यालयांत वचून तें काडपाची मागणी केली. लोकांचो विरोध असून लेगीत उदकास्रोत खात्या वतीन बांधार्याच्या कामाक सुरवात केल्ल्यान गरज पडल्यार खर आंदोलन करपाची शिटकावणी ग्रामस्थानी ह्या वेळार दिली. सरपंच संजना नायक हांणी कायदेशीर सल्लो घेवनूच बांधा संबंदी न्यायालयांत दाद मागतले अशें आस्वासन ग्रामस्थांक दिलें.
फाटल्या दोन वर्सां सावन मुर्डी गांवचे लोक बांधाक खर विरोध करतात. लोकांचो विरोध आशिल्ल्यान सरकारान १४४ कलम लागू करून कामाक सुरवात केल्या. बिरेस्तारा सकाळीं सुमार ६०-७० ग्रामस्थ पंचायत कार्यालयांत वचून सरपंच आनी हेर पंचांक जमावबंदी काडपा खातीर पंचायत मंडळान फुडाकार घेवपाची मागणी केली. तशेंच काम बंद करपा खातीर जलस्रोत खात्याक पत्र धाडून काम बंद करपाची मागणी केली.
सरपंच संजना नायक, थळावे पंच अभिषेक गावडे आनी मनीष नायक हांणी काम सुरु आशिल्ले सुवातेर वचून पळोवणी केली. तेन्ना सर्व्हे क्रमांक ३२/१ चेर उदकास्रोत खात्यान काम सुरु केल्ल्याचें दिसून आयलें.
पंचायत मंडळान आदीं सावनूच ग्रामस्थांक फाटबळ दिलां. बांधाचें काम बंद करपा खातीर आनी जमावबंदी काडपा खातीर संबंदीत खात्याक पत्र धाडलां. ग्रामस्थांच्या मागणे प्रमाण कायदेशीर सल्लो घेवन पंचायती वतीन न्यायालयांत वतले अशें सरपंच संजना नायक हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
