भांगरभूंय | प्रतिनिधी
पणजी, प्रतिनिधी ः गोंय आनी हेर राज्यांनी व्हरपाक हाडिल्लो 15 कोटी मोलाचो २ किलो कोकेन केंद्रीय घुंवळे वखदां नियंत्रण ब्युरोच्या (एनसीबी) मुंबय विभागान मुंबय जप्त केलो. मुंबयच्या हॉटेलांतली झांबियाचो प्रवासी ला गिलमोर आनी दिल्ली रावपी टांझानियाची नागरिक एम आर आगुस्तिनो हांकां ह्या प्रकरणांत अटक केल्या. हे कारवायेंत एके बायले सयत दोन विदेशी नागरिकांक अटक.
एनसीबीच्या मुंबय विभागान दिल्ले म्हायती प्रमाण, गोंय, मुंबय, दिल्ली आनी बेंगळुरू हांगा तस्करी करपा खातीर आफ्रिकन देशांतल्यान कोकेन येता ही म्हायती एनसीबीक मेळिल्ली. ते प्रमाण एनसीबीच्या अस्तंत क्षेत्रीय संचालक अमित घावटे हांच्या मार्गदर्शना खाला पंगडान चवकशी केली, तेन्ना 9 तारखेक इथिओपियांतल्यान परकी प्रवासी आयिल्ल्याची म्हायती मेळ्ळी. विभागान ताचो सोद घेतलो तेन्ना तो परकी नागरिक मुंबयच्या एका हॉटेलांत रावता अशें कळ्ळें. ते प्रमाण खात्यान ताची चवकशी केली तेन्ना ‘ला गिलमोर’ हो झांबियाचो नागरिक आशिल्ल्याचें कळ्ळें आनी ताका अदिस अबाबा – इथिओपिया हांगाच्यान कोकेन घेवन भारतांत वचपाक सांगलां, अशें कळ्ळें.
ते प्रमाण ताच्या बॅगेची आनी सामानाची तपासणी केली जाल्यार बॅगेत 15 कोटी रुपयाचें कोकेन मेळ्ळें. ताची चवकशी केले उपरांत आंतरराष्ट्रीय वेपाऱ्यांनी दिल्लींतले एके बायलेक ड्रग्स पुरवण करपाक सांगलां, अशें ताणें सांगलें.
ते प्रमाण खात्यान ताचे वरवीं दिल्लींतले बायले कडेन संपर्क सादलो आनी 11 तारखेक ताका दिल्लीक व्हेलो. थारयल्ल्या प्रमाण ती बायल ड्रग्स घेवपाक पावली तेन्ना खात्यान तिका ताब्यांत घेतली. ते बायलेचें नांव एम आर आगुस्तिनो (टांझानिया) अशें आसा. उपरांत एनसीबीन दोगांयक मुंबय हाडून अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
