भांगरभूंय | प्रतिनिधी
सुदैवान चालका सयत दोन कामगार वाटावले
म्हापशें: मार्ना-शिवोले देंवतेर ब्रेक फेल जाल्ल्यान कड्डण व्हरपी टेम्पो राखणे वण्टीक धपको दिवन उमथलो. सुदैवान टेम्पो चालक आनी दोगां कामगारांनी वेळारूच सुरक्षीत सुवातेर उडी मारिल्ल्यान वाटावले.
हो अपघात काल (मंगळारा) सकाळीं 9.45 वरां मजगतीं घडलो. जीए 11 टी 1521 क्रमांकाचो टेम्पो कड्डण घेवन गणेशपुरी म्हापशें मार्गान शिवोलेचे दिशेन वतालो. मार्ना मुखेल रस्त्यार पावचे पयलींच देंवतेर टेम्पोचे ब्रेक फेल जाले.
जाल्यार ह्याच वेळार मुखा वेल्यान एक दुचाकी आयली. ह्या दुचाकी वयल्या दोगांक वाटावपा खातीर चालक अनीलकुमार माली (उत्तर प्रदेश) हाणें टेम्पो दावे वटेन घुंवडायलो. तेन्ना रस्त्याचे राखणे वण्टीक धपको दीत टेम्पो रस्त्याचे कुशीक उमथलो.
ताचे पयलीं प्रसंग पळोवन ट्रक चालक आनी दोगां लोडर कामगारांनी टेम्पोंतल्यान सकयल उडी मारली आनी आपलो जीव वाटायलो.
अपघाताक लागून टेम्पोंतल्या कड्डणाचें लुकसाण जालें. अपघाताचो पंचनामो हणजूण पुलीस हवालदार रुपेश शेटगांवकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
