भांगरभूंय | प्रतिनिधी
एकलो गंभीर जखमी; गोमॅकाँत घेता उपचार
म्हापशें: पोरण्या मांडवी पुलार ओव्हरटेक करतना इनोव्हा मोटारीचो मोटारसायकलीक धपको दिल्ल्यान तीन वाहनांचो अपघात जालो. हातूंत दुचाकी चालक श्यामसुंदर वरक (रा. पावशी, कुडाळ) हो गंभीर जखमी जालो. ताचेर गोमॅकाँत उपचार सुरू आसात.
हो अपघात मंगळारा सकाळीं 7.10 वरांच्या सुमाराक पोरण्या मांडवी पुलार जालो. एमएच 07 एएन 6278 क्रमांकाचे मोटारसायकली वयल्यान जखमी श्यामसुंदर वरक हो पणजे सावन पर्वरेचे दिशेन येतालो. ताचे फाटल्यान अक्षय एकावडे हो एमएच 07 एए 2487 क्रमांकाचेर दुचाकीचेर आशिल्लो. जाल्यार जीए 03 पी 5139 क्रमांकाची इनोव्हा मोटार घेवन अभय सिंग हो पणजेचे दिशेन वतालो.
बेती जंक्शन काडले उपरांत कांय अंतराचेर इनोव्हा चालकान दुसऱ्या वाहनाक ओव्हरटेक करपाचो यत्न केलो. ह्या वेळार मुखा वयल्यान येवपी मोटारसायकलीक मोटारीन धपको दिलो. ते बरोबर दुचाकी चालक वरक हो गाडये वयल्यान उसळून स्कुटरीचेर पडलो आनी गंभीर जखमी जालो.
ह्या अपघाता उपरांत पुलार येरादारीची कोंयडी जाली. एम्बुलन्सींतल्यान जखमीक गोमॅकाँत उपचार खातीर दाखल केला. थंय ताचेर उपचार सुरू आसात. अपघाताचो पंचनामो पर्वरी पुलीस हवालदार विवेक तोरसकार हांणी केलो आनी मोटार चालका आड अपघाताचो गुन्यांव नोंद केला. फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
