मडगांव पालिका मुखेल अधिकाऱ्यांक प्रदुशण मंडळा कडल्यान नोटीस
भांगरभूंय | प्रतिनिधी
मडगांव, प्रतिनिधी ः गोंय प्रदुशण नियंत्रण म्हामंडळान केल्ले पळोवणेंत पालिकेच्या एसजीपीडीएतल्या बायोमिथेनेशन प्रकल्पांतल्यान घाणयारे उदक आनी प्रक्रिये उपरांतली घाण उक्त्या सुवातेर सोडटा अशें दिसून आयलें. हाचेर कसलोच उपाय करूंक ना. देखून आतां गोंय प्रदुशण नियंत्रण म्हामंडळान मडगांव पालिकेच्या मुखेल अधिकाऱ्यांक कारणा दाखयात नोटीस जारी करून 1 डिसेंबराक कार्यालयांत हाजीर रावपाचे निर्देश दिल्यात
चार दिसां आदीं पर्यावरण मंत्री आलेक्स सिक्वेरा हांणी आमदार विजय सरदेसाय हांच्या मागणे प्रमाण एसजीपीडीएच्या 5 टीपीडी बायोमिथेनेशन प्रकल्पाची पळोवणी केली. हो प्रकल्प बंद आसलो. पूण मंत्री पळोवणी करपाक येता हें कळटकच रोखडेंच देखरेखीचें काम सुरू केलें.
पालिकेन दिल्ले म्हायती प्रमाण, गोंय प्रदुशण मंडळाचो अधिकारी संजीव जोगळेकार हांकां प्रकल्पाचें ऑडिट करपा वांगडाच मडगांव पालिकेक नोटीस जारी करपाक सांगलें. तशेंच प्रदुशण जाल्यार पर्यावरण कायद्या प्रमाण जापसालदार सरकारी अधिकाऱ्यां आड कारवाय करपाची शिटकावणी दिली.
मंत्री सिक्वेरा हांणी 28 सप्टेंबर 2023 दिसा केल्ले पळोवणी उपरांत गोंय प्रदुशण नियंत्रण मंडळान जारी केल्ले सुचोवणे प्रमाण कारवाय करुंक नाशिल्ल्यान आनी पालिका मुखेल अधिकाऱ्याक प्रदूशणा संबंदी ‘कारण दाखयात’ नोटीस जारी केल्या. ऑक्टोबर 2022 सावन बायोमिथेनेशन प्रकल्पांतल्यान प्रक्रिये उपरांत उदक आनी कोयर व्हरूंक ना. घाण उदक आनी कोयर उक्त्या जाग्यार सोडटात.
रातच्या वेळार टँकरांनी घाण उदक व्हरप, वाठारांत घाणयारे उदक सोडप बंद करपाचे निर्देश दिल्ले आनी 15 दिसां भितर मंडळाक अहवाल सादर करपाक सांगिल्ले. पूण उपाय करपाक पालिका अपेशी थारली. ते प्रमाण कारवाय कित्याक करची न्हय हाचो अहवाल सादर करपा खातीर आनी 1 डिसेंबर दनपारां 3.30 वरांचेर राज्य प्रदुशण नियंत्रण मंडळाच्या साळगांवच्या कार्यालयांत हाजीर रावपा खातीर कारण दाखयात नोटीस जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
