भांगरभूंय | प्रतिनिधी
मडगांव, प्रतिनिधी: एसजीपीडीएच्या ठोक मार्केटा कडेन पयशांची लूट चल्ल्या असो आरोप ठोक नुस्ते विक्रेते संघटणेच्या वांगड्यांनी केलो. मार्केटांत गाडयो व्हरपा खातीर पयशे घेतात. तशेंच गाडयो भायर काडल्या उपरांत धा मिनटां खातीर सामान दवरपाक गाडी उबी केल्यार रोखडेंच शुल्क घेतात. कर घेवप्यां कडेन कसलेच तरेचें वळखपत्र नासता. मात ते दादागिरी करून पयशे दिवपाक लायतात, असो तांणी आरोप केलो.
मडगांव पालिका मुख्याधिकार्यांक मेळपा खातीर नुस्तेमार आयिल्ले. मुख्याधिकारी पालिकेंत नाशिल्ल्यान मंगळारा परत येतले अशें तांणी सांगलें.
ह्या वेळार प्रसारमाध्यमां कडेन उलयतना, नुस्तें विक्रेते संघटणेचे वांगडी प्रभाकर नायक हांणी सांगलें- फाटल्या २५ वर्सां सावन आपूण नुस्तें विक्रेच्या वेवसायांत आसा. पूण सध्या जशी लूट चल्ल्या तशी केन्नाच जायनाशिल्ली. देशभरांतल्या नुस्तें मार्केटांत आपूण भोंवलां. चडांत चड ३०० रुपया शुल्क घेतात. पूण वरां वयर शुल्क खंयच घेनात. मार्केटांत गाडी व्हेल्यार वरां प्रमाण शुल्क घेतात. पूण गाडी मार्केटांतल्यान भायर काडल्यार ओम कन्स्ट्रक्शन नांवाचे कोणतरी पावती दिता आनी कांय व्यक्तीं कडल्यान २०० रुपया घेतात. पयशे दिना जाल्यार दादागिरी करतात. आदीं नुस्तेंकार बरे तरेन मार्केट चलयताले. पूण फाटल्या दोन वर्सां सावन सोपो कलेक्शनाच्या नांवा खाला पयशे एकठांय करतात. पूण गरजेच्यो सुविधायो दिनात. तशेंच मार्केटांत हळशीत पातळ्ळ्यार असोसिएशनाचेरूच आरोप जातात. नितळसाण करपा खातीर असोसिएशनान दोग कामगार दिल्यात. एसजीपीडीएन हाचेर खर कारवाय करपाची गरज आसा. जांचे कडल्यान सोपो घेतात तांणी नितळसाण राखपाची गरज आसा. पालिका मुख्याधिकार्यांनी गाडी मार्केटांतल्यान भायर काडली काय २०० रुपया घेवपी ओम कन्स्ट्रक्शनाच्या व्यक्तींचेर कारवाय करपाची गरज आसा, अशी मागणी नायक हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
