भांगरभूंय | प्रतिनिधी
मडगांव, प्रतिनिधी : मडगांवच्या शिक्षणीक संस्थांच्या विद्यार्थ्यांक आनी पालकांकूय येरादारी गचमुड्डी, पार्कींगाच्यो समस्या येतात. दवर्ले शिक्षणीक हब उबारपाक जागो केला. मुख्यमंत्री डॉ. प्रमोद सावंत हांचेय कडेन हे विशीं चर्चा जाल्या. फुडल्या चार म्हयन्यांनी ते सुवातेर जागे वाट्टले अशें आस्वासन मुख्यमंत्र्यान दिलां, अशें आमदार उल्हास तुयेंकार हांणी सांगलें
राया पॉप्युलर स्कुलाचे नवे इमारतीच्या कामाचो बुन्यादी फातर बसयलो. ह्या वेळार आमदार उल्हास तुयेंकार, आमदार विजय सरदेसाय, पॉप्युलर ज्ञान प्रबोधिनीचे अध्यक्ष अवधूत प्रभू पर्रीकार, मुख्याध्यापक सुचित्रा देसाय, आदेश कारवारकार, परेश कारवारकार आनी हेर मानेस्त हाजीर आशिल्ली.
आमदार सरदेसाय हांणी शिक्षणीक हबाचो मुद्दो मुखार हाडून म्हणलें, मडगांव शारांतल्यो शाळा आनी म्हाविद्यालयांतल्या पालक आनी विद्यार्थ्यांक शाळा सुरू जातना आनी सुटल्या उपरांत येरादारी गचमुड्डीक तोंड दिवचें पडटा. ताका लागून शिक्षणीक हब तयार करून मडगांवच्यो शाळो आनी म्हाविद्यालयां स्थलांतरीत केल्यार हो प्रस्न सुट्टलो. ताका लागून राज्य सरकारा कडल्यान फुडाकार घेवपाची गरज आसा. लोकप्रतिनिधींकडल्यान फाटपुरवण करपाची गरज आसा.
मडगांवां मॉडर्न सुविधा ना आनी त्यो उबारपाक कोणूच फुडाकार घेनात. दवर्लेचे सरकारी जमनीचेर शिक्षणीक हब उबारपाचें आशिल्लें. पर्रीकार हांकां मरण आयल्या उपरांत नवें सरकार आयलें. उपरांत जाल्ल्या अधिवेशनांत हो मुद्दो घेतिल्लो आनी खाजगी विधेयकूय संमत जाल्लें. फुडल्या अधिवेशना पयलीं हो एज्युकेशनल हब कॉम्प्लेक्स सुरू जावचो अशेंय थारिल्लें. उपरांत सरकारान हे विशीं कांयच करूंक ना. सरकार आपलें काम करिनाशिल्ल्यान शाळांकूच हेर कडेन जागो सोदपाची गरज आसा अशऐंय सरदेसाय हांणी फुडें म्हणलें.
आमदार तुयेंकार हांणी सांगलें, दवर्ले १.२० लाख चौरस मिटर जागो शिक्षणीक हबा खातीर उपलब्ध आसा. कुजिराप्रमाण मडगांवचीं सगळीं शिक्षणीक आस्थापनां एकेच कडेन हाडपा खातीर तो उबारतले. खुबश्या वर्सां पयलीं ह्या जाग्याचें संपादन जालां. पूण कांय कारणांक लागून शिक्षणीक संकुलाचें काम आडखळून उरलां अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
