भांगरभूंय | प्रतिनिधी
आमदार दिगंबर कामत: फुडल्या म्हयन्यांत काम सुरू
मडगांव । प्रतिनिधी : मडगांव शारांतली पार्किंगाची समस्या बेगीनूच सोडयतले. येरादारी गचमुड्डीचेर उपाय म्हणून पार्कींग प्रकल्प उबारतात. फुडल्या आठ दिसांनी पार्किंग प्रकल्पाची निविदा काडटले आनी सप्टेंबरा सावन प्रकल्पाचें काम सुरू जातलें, अशी म्हायती आमदार दिगंबर कामत हांणी आयज सोमारा दिली.
मडगांवकारांक फाटल्या कितल्याशाच वर्सां सावन पार्किंगाची समस्या सतायताली. पालिकेच्या आदल्या नुस्तें मार्केटाच्या जाग्यार भोवमजली प्रकल्प उबारप अशें थारिल्लें. पूण, बांदकामाच्या वाडत वचपी मोलाक लागून खुबश्यो आडखळी येत रावल्यो. 2015 त हो प्रकल्प उबारपाक बुन्यादी फातर बसयल्लो. पूण तेन्नाच्यान आतां मेरेन आठ वर्सांचो काळ सरलो तरीय पार्कींग प्रकल्पाचें काम सुरू जावंक ना. सध्या लोक येरादारीची गचमुड्डी जाल्ल्यान बरेच त्रास सोंसतात. शाळा भरपा- सुटपाच्या वेळार हांगा सदांच येरादारीची कोंयडी जाल्ली पळोवपाक मेळटा.
शिरवडें- मडगांव वाठारांतल्या चॅपेला भोंवतणचे राखणे वणटीच्या कामाची सुरवात आमदार कामत हांचे हस्तुकीं जालो. साडे तेरा लाखांचें हें काम. हो वाठार सकयल आशिल्ल्यान पावसाच्या उदकाक लागून माती कोसळपाची समस्या आशिल्ली. राखणे वखट उबारल्या उपरांत माती कोसळप बंद जातलें, अशें कामत हांणी सांगलें. मडगांवचे पार्कींग समस्येचेर उलयतना, तोय प्रस्न रोखडोच सुट्टलो. पालिकेन फकत एक पत्र दिवपाचें उरलां. उपरांत आदल्या नुस्तें मार्केटाच्या जाग्यार भोवमजली पार्कींग प्रकल्प उबारपाक निविदा जारी करतले. सप्टेंबरांत प्रकल्पाच्या कामाक सुरुवात जातली, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
