भांगरभूंय | प्रतिनिधी
भावंडांनो,
मनीस ह्या संवसारांत जियेतना भोंवतणच्या समाजाचे उदरगती खातीर थोड्या प्रमाणांत तरी वावुरताच. कांय मनीस भोंवतणच्या समाजाचे आपणाचेर व्हड उपकार जाल्यात आनी ताचें तें उपकाराचें रीण आपूण केन्नाच फारीक करूंक पावचोना अशी भावना मनांत रुजोवन नेमान समाजाचे उदरगती खातीर वावरत रावता. अशे तरेच्यो देखी आमकां इतिहासांत खुबूच मेळटात. अश्या वेळार तांचे तें जिणे सार्थक जालें अशेंच म्हणचें पडटलें.
भावंडांनो, फाटल्या सप्तकांत, सोमारा तुमी वीर सावरकर हांची पुण्यतीथ पाळ्ळी. वीर सावरकर म्हळ्यार म्हान क्रांतीकारक प्रतिभावंत साहित्यीक, बुद्धीवादी, समाजसुधारक, अत्यंत बुद्धीमान, स्वाभिमानी आनी आतां मेरेनच्या भारतियांचे ते प्रेरणास्थान.
28 तारखेर पुराय देशांत शाळांनी, महाविद्यालयांनी विज्ञान दिसाच्यो तरेकवार कार्यावळी मनयल्यो. म्हान विज्ञानीक सी.व्ही. रामन हांच्या उगडासाक तो दीस ‘विज्ञान दीस’ म्हूण मनयतात. भावंडांनो, विज्ञानान देशांत आनी विज्ञानाच्या मळार खुबूच उदरगत हातासल्या. विज्ञानाक लागुनूच मनशाक विंगड विंगड साधनांचो लाव मेळत आसा. विज्ञाना वरवींच आमी जायतीं सुखां मेळोवंक पावले. जायत्या पिडा दुयेंसांचेर जैत जोडूंक पावले. घरा कडेन एकाच सुवातेर बसून संवसाराचें गिन्यान मळोवंक पावले.
भांवडांनो, मनीस ही जीण जियेतना ताच्या पावलां कणकणीं ताचे भोंवतणी कितलींशींच संशोधनाचीं बियां शिवरलेलीं आसात. ज्या मनशाक तीं दिसता तोच त्या बिंयांक रुजोवन तातूंतल्यान नवनिर्मिती घडोवन हाडटा. समाजाचें बरें करूंक पावता. आपल्या कश्टांचेर हेरांक तशेंच समाजाक बरें फळ चाखूंक दिता.
भावंडांनो, अंदूंच्या ह्या विज्ञान दिसाच्या निमतान आमी भावंडां हीं आमच्या भोंवतणी शिंवरलेल्या संशोधनाचीं बिंयां पारखूंक, वळखूंक, आनी सोदूंक शिकुया. संशोधनाचीं बिंयां सोदून काडून तांचीं रोंपां तुमचे तांकीन किल्लयल्यार फुडारांत जैत आनी समृद्धीची सावळी तुमकां मेळटली.
भावंडांनो, विज्ञान हें कोंणाच्याच नाशा खातीर नासता. तें मनशाचे उदरगती खातीर आसा. हाची जाण दवरून तुमी तुमचो फुडार पर्जळीत करपाचो यत्न करशात? मना कडेन निश्चेव केल्यार हेरांवरी आमीय समाजाक खूब कितें तरी दिवंक पावतलीं. तुमी ते खातीर यत्न करशात???
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
