भुरग्यां मदीं वाडटा न्युमोनियाचें प्रमाण

भांगरभूंय | प्रतिनिधी

भुरग्यां मदीं चड प्रमाणांत दिसपी एक दुयेंस म्हळ्यार न्युमोनिया, जें केन्ना केन्ना खूब गंभीर जाता. खंयच्याय हंगामांत न्युमोनिया जावं येता, पूण गिमाच्या दिसांनी ताचो धोको चड वाडटा, कारण गिमाच्या दिसांनी ओलसाणेक लागून बॅक्टेरिया बेगीन वाडूंक शकतात आनी ताका लागून संसर्ग जाता. वेळार उपचार केलो ना जाल्यार हें दुयेंस भुरग्यां खातीर खूब धोक्याचो थारूंक शकता, देखून फकत थंडी अशें समजून ताच्या लक्षणां कडेन आडनदर करची न्हय.
न्युमोनिया खंयच्याय पिरायेच्या मनशांक जावं येता, पूण 5 वर्सां सकयल्या भुरग्यांक हो दुयेंस चड धोक्याचो आसता. वेळार उपचार करुंक ना जाल्यार न्युमोनियाक लागून भुरग्यांच्या फुफ्फूसात संसर्ग जावन ऑक्सिजनाची पातळी देंवता. जायते फावटीं हाका लागून जायत्या भुरग्यांचो जीव वता. देखून तुमकां खंयचीय लक्षणां दिसल्यार रोखडेंच दोतोरा कडेन वच्चें.
भुरग्यांक न्युमोनिया बॅक्टेरिया आनी व्हायरस संसर्गाक लागून जाता, देखून रोगप्रतिकार शक्त दुबळी आशिल्ल्या भुरग्यांक न्युमोनिया जावपाची चड शक्यताय आसता. तशेंच वेळार लस दिवंक नाशिल्ल्या भुरग्यांक न्युमोनिया जावपाचो धोको चड आसता. कांय भुरग्यांक जल्माक येतना वजन उणें, दुबळेंपण आदी आसता तांका न्युमोनिया जावं येता.
भुरग्याक थंडी जाल्या आनी तांका दूद पियेवपाक त्रास जाता जाल्यार तें न्युमोनियाचें लक्षण आसूं येता. तुमकां खूब थंडी लागता वा घाम चड येता, स्वास घेवपाक त्रास जाता, छातींत जळजळता, वेगान स्वास घेवप जाता जाल्यार रोखडोच दोतोराचो सल्लो घेयात. सौम्य लक्षणां म्हळ्यार नाक बंद जावप, जोर येवप, अस्वस्थतायेक लागून भुरग्याचें चड रडप अशा गजालींचेरूय लक्ष दिवचें.
ल्हान भुरग्यांक संसर्ग जावपाची चड शक्यताय आसता, देखून तांकां थंडी आनी खोंकलेचीं लक्षणां आशिल्ल्या लोकां पासून पयस दवरात, भुरग्यांक लागीं घेवचे पयलीं हात बरे धुंवचे, भुरग्यांक गर्दीच्या सुवातेर व्हरूंक नाकात. तशेंच धूम्रपानाची सुवात आनी धूम्रपान करपी लोकां पासून पयस दवरात.
तुमचें भुरगें स म्हयन्यां परस उणें आसल्यार चड जतनाय घेयात. ताका फकत आवयचें दूद दिवचें. कारण भुरग्यांची रोगप्रतिकार शक्त वाडोवपाक आवयचें दूद बरें आसता. भुरगें मात्शें व्हडलें आसल्यार ताच्या आहाराची खाशेली जतनाय घेवची.