भांगरभूंय | प्रतिनिधी
फोंडें, प्रतिनिधी: फोंड्यां सध्या जमनी पोंदच्यान सरयो (केबल) घालपाचें काम सुरू आसा. पूण, शारांत जायते सुवातींचेर फोंडकुलां मारून दवरिल्ल्यान येरादारीक आडखळ निर्माण जाता. जमनी पोंदच्यान केबल घालपाचें काम सुरू आशिल्ल्यान शारांत येरादारी गचमुड्डी जाता. शारांत सुरू आशिल्लें काम रोखडेंच पुराय करून येरादारीचो त्रास सोडोवपाची मागणी वाहन चालक करता.
फोंडें वाठारांत कांय सुवातांचेर फोंडकुलां मारिल्ल्याक बरेच दीस गेले. तरीय आजूनय कामां पुराय जायनात. ताका लागून सकाळीं, दनपरां आनी सांजेवेळार शारांत येरादारी गचमुड्डी जाता. हॉटेल मिनीनो फुडल्या रस्त्याचेर दनपरां येरादारी गचमुड्डी जाता. ताका लागून वीज खात्यान बेगीनूच काम पुराय करून रस्त्या वयली येरादारी सुरळीत करपाची गरज आसा.
वारखंडे वाठारांतल्या अशीर रस्त्याचेर पार्क करून दवरिल्ल्या वाहनांचो परिणाम येरादारीचेर जाता. हॉटेल मिनीनो ते शांतीनगर हांगच्या जंक्शना लागसारच्या रस्त्या कुशीक चार चाकी वाहनां पार्क करतात. वयल्या बाजारांत व्हडा प्रमाणांत रस्त्या कुशीक पार्क केल्लीं वाहनां येरादारीक आडखळ निर्माण करता. ताका लागून येरादारीक पुलिसांनी धोको निर्माण करपी पार्कींगा कडेन लक्ष दिवपाची मागणी वाहन चालक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
